११ चैत, काठमाडाैं । रामेछाप जिल्लाकाे दाेरम्बा शैलुङ गाउँपालिका वडा नं. ४ काे पार्सामा यहि साेमबार जेठानद्वारा बहिनी ज्वाइँमाथि कुटपिट गर्दा ज्यान गएकाे घटनामा फरार रहेका अभियुक्तले रामेछाप प्रहरीसमक्ष आत्मसमर्पण गरेका छन् ।
घटनालगत्तै फरार भएका ६० वर्षीय जेठान विरबहादुर तामाङ (घिसिङ)ले आज बुधबार बिहान साेही वडाका पासेवान प्रहरी चाैकीका टाेलीसमक्ष आत्मसमर्पण गरेका हुन् । आफैं उपस्थित हुन भनी चाैकीतर्फ गइरहेका बेला उनकाे खाेजीमा निस्केका प्रहरी टाेलीसामु खारपानीमा आत्मसमर्पण गरेकाे समाचार प्राप्त भएकाे छ ।
छिमेकी गाउँबाट उक्त दिन भाेर्ले (घर)बाट ज्वाइँ प्रेमबहादुर (श्रीमती)सहित ससुरालीमा सगुन लिएर गइरहेका अवस्थामा जेठान विरबहादुर (अभियुक्त)सँग घरनजिकै भेट भएकाे र साे क्रममा सामान्य विषयमा विवाद हुँदा ज्वाईँमामथि मुक्का प्रहार गर्दा बेहाेस् भएकाे थियाे । बेहाेसपछि पनि लातीले प्रहार गर्दा संवेदनशील अंगमा लागेर ज्वाईँ प्रेमबहादुरकाे घटनास्थलमै ज्यान गएकाे पाइएकाे प्रहरीकाे दाबी छ ।
अभियुक्त घिसिङलाई आजै सदरमुकाम मन्थली पुर्याई आवश्यक अनुसन्धान शुरू भएकाे प्रहरीले जनाएकाे छ । उता मृतककाे मंगलबार नै काभ्रेकाे धुलिखेल अस्पतालमा पाेष्टमार्टम भई दाहसंस्कार भइसकेकाे छ ।
