काठमाडौँ । प्यालेस्टिनी लडाकु समूह हमासले बन्धक बनाएको अवस्थामा निधन भएका कञ्चनपुरका विपिन जोशीको शव सोमबार काठमाडौं आइपुगेको छ।
प्रधानमन्त्री सुशीला कार्की त्रिभुवन अन्तर्राष्ट्रिय विमानस्थलमा पुगेर विपिनको शवमा श्रद्धाञ्जली दिएकी छिन्। उनको साथमा मन्त्रिपरिषद्का सदस्यहरू पनि उपस्थित थिए। नेपाली सेनाले विपिनको शवलाई अन्तिम दाहसंस्कारको लागि महेन्द्रनगर लैजाने तयारी गरेको छ।
७ अक्टोबर २०२३ मा हमासले विपिनलाई गाजापट्टीसँग सिमाजोडिएको इजरायलको दक्षिणी क्षेत्र अलुमिम किवुजबाट बन्धक बनाएर लगेको थियो। एक महिनापछि इजरायली सेनाले विपिनको जीवित भिडियो फेला पारेको थियो।
इजरायल र हमासबीच जारी युद्ध अन्त्य गर्ने क्रममा अमेरिकाले प्रस्ताव गरेको मध्यपूर्व शान्ति योजनाको पहिलो चरण अनुसार बन्धक र प्यालेस्टिनी कैदी रिहा गर्ने सहमति भएपछि हमासले गत सोमबार विपिनको शव हस्तान्तरण गरेको थियो। जुन सम्झौता अनुसार जोशीको शब हमासले ईजरायललाई हस्तान्तरण गरेको थियो ।
