संयुक्त अरब इमिरेट्स (युएई) को भिषा नपाएपछि नेपाल क्रिेकट संघले अन्तर्राष्ट्रिय क्रिकेट परिषद्(आईसिसी) सँग गुहार मागेको छ । नेपाल र वेष्ट इन्डिजबीच तीन अन्तर्राष्ट्रिय टी–२० आई शृंखला युएईमा हुँदैछ ।
क्यानले युएई जाने टिमलाई बिहीबार बिदाई गरेको थियो । तर, बुधबारबाटै खेलाडीको भिषा लगाएपनि शुक्रबार रातिसम्म खेलाडी तथा पदाधिकारीको भिषा नआएको प्रवक्ता छुम्बी लामाले जानकारी गराए ।
भदौं २३ र २४ जेन जी आन्दोलनपछि युएईले नेपालको भिषामा कडाई गरेको छ । भिषा अस्थायीरुपमा बन्द गरिएको छ । जसका कारण नेपाली टिम समयमै युएई जानबाट रोकिएको छ ।
क्यान प्रवक्ता लामाले भिषाको लागि आईसिसीसँग सहकार्य भइरहेको र भिषा लागेसँगै टिम युएई जान तयार भएको पनि नयाँ पत्रिकालाई बताएका छन् । ‘ सिधै भिषा नआएपछि दुबई क्रिकेट र आईसिसी दुबैसँग सहकार्य गरिरहेका छौं । भिषा आएपछि टिम जान्छ । अब, आउँछ भन्नेमा क्यान आशावादी छ,’ लामाले भने, ‘हामीसँग अझै ५–६ दिन बाँकी छ । यसमा आशावादी हौं ।’
शृंखला सेप्टेम्बर २७ देखि ३० सम्म शारजाहँ क्रिकेट मैदानमा हुनेछ । नेपालले यो शृंखलालाई ओमानमा आयोजना हुने आइसिसी टी–२० विश्वकप एसिया छनोटको तयारीका रूपमा लिएको छ ।
