३१ असार, काभ्रेपलाञ्चोक । बर्षाले ठाँउ ठाँउमा पहिरो गएपछि बिपी राजमार्ग अबरुद्ध बनेको छ ।
सोमबार राति आएको बाढी र केही ठाउँमा खसेको पहिरोले राजमार्ग अवरुद्ध भएको इलाका प्रहरी कार्यालय मंगलटारका प्रमुख ईश्वर कार्कीले जानकारी दिए ।
बीपी राजमार्ग अन्तर्गत रोशी–९ पिन्थलीबेशी, मंगलटार बिरुवाडाँडामा रहेको फेदीखेला र साङखोला, रोशी ११ कालढुंगा, रोशीकै ११ र १२ को सिमानाको माम्ती खोलामा आएको बाढीले सडक कटान गरेकोले राजमार्ग अवरुद्ध छ ।
यस्तै, काभ्रे र सिन्धुलीको सिमाना बर्खेखोलामा आएको बढीको कारण सडक अवरुद्ध छ भने रोशी कै पिप्लेमा आएको पहिरो, पानीतारेनजिक झरेको पहिरोको कारण सडक अवरुद्ध भएको छ ।
लेदो सहितको पहिरो आएको र सो पन्छाउने कार्य जारी रहेकाले बाटो खुल्न अझै केही समय लाग्ने बताईएको छ ।
सडक अवरुद्ध भएपछि यात्रु र सवारी साधनको सुरक्षाका लागि काभ्रे र सिन्धुली प्रहरीले सवारी साधन होल्ड गरेको छ ।
काभ्रेबाट सिन्धुली जाने सवारीसाधनलाई काभ्रेभञ्ज्याङ र भकुण्डेमा होल्ड गरेको छ भने सिन्धुली प्रहरीले सदरमुकाम सिन्धुलीमाडी, हिरापानी चेकपोष्ट, खुर्कोट, अन्य पहिरो जाने सम्भावना नभएका स्थानमा यात्रु र सवारी साधनको सुरक्षाका लागि सयौंको संख्यामा होल्ड गरिएको छ ।
काठमाडौंबाट पूर्व जाने र पूर्वबाट काठमाडौं जाने सवारी साधन तथा मालबाहक सवारी होल्ड हुँदा लामो एकतर्फी लामो जाम भएको छ भने यात्रुहरु अलपत्र छन् ।
