असार १६ काठमाण्डौँ । पत्रकार दिलभूषण पाठकविरुद्ध साईबर अपराधको मुद्धा दर्ता भएको छ ।
आज सोमबार जिल्ला अदालत काठमाडौँमा उनीविरुद्ध मुद्दा दर्ता भएको हो।
पाठकले नेपाली कांग्रेसका सभापति शेरबहादुर देउवा र परराष्ट्रमन्त्री आरजु राणा देउवाका छोरा जयवीर देउवाको तारे होटल हिल्टनमा लगानी रहेको, अस्ट्रेलिया, क्यानडा, दुबईमा पनि लगानी रहेको भन्ने दाबीमा आधारित ब्रिफिङ सामग्री युट्युबमा प्रसारण गरेका थिए।
उक्त कार्यक्रम भिडिओ, स्क्रिनसट, कागजातहरू पनि अभियोगपत्रका साथ पेस गरिएको छ।
यसअघि नै जिल्ला अदालतबाट पक्राउ पुर्जी लिएर साइबर ब्युरोले अनुसन्धान गर्ने तयारी गरे पनि उच्च अदालतले पाठकलाई पक्राउ नगर्न अन्तरिम आदेश जारी गरेको थियो।
सोहीकारण पाठकको बयानसमेत नगराई अदालतमा अभियोगपत्र बुझाइएको छ। उनलाई विद्युतीय कारोबार ऐन–२०६३ अन्तर्गत सजाय माग गरिएको छ। उनीविरुद्ध देउवा परिवारले उजुरी दिए पनि अभियोगपत्रमा जाहेरवालाको उनीहरु कसैको नाम छैन ।
यो अभियोग अनुसार पाठक बिरुद्ध एक लाख सम्म जरिवाना वा पाँच वर्ष सम्म कैदको सजाय हुन सक्ने प्रावधान रहेको छ ।
