काठमाडौं असार ११ । विशेष अदालत काठमाडौंमा एकीकृत समाजवादी पार्टीका अध्यक्ष माधव कुमार नेपालको बयान सकिएको छ ।
न्यायाधीशहरू तेजनारायण सिंह राई,रामबहादुर थापा र विदुर कोइरालाको इजलासमा नेपालको बयान सकिएको हो। बयान सकिएकाले केही बेरमा नेपालविरुद्ध थुनछेक बहस सुरू हुने अदालतका सूचना अधिकारी यज्ञराज रेग्मीले अन्नपूर्णलाई जानकारी दिए।
नेपालको तर्फबाट वरिष्ठ अधिवक्ता शम्भु थापा, गोविन्द बन्दी,खम्बहादुर खातीलगायत सय बढीजनाले बहसका लागि नाम टिपाएका छन् । थुनछेक बहस पछि पुर्पक्षका लागि नेपाललाई कारागार पठाउने कि बाहिरबाटै मुद्दा लड्न पाउने आदेश हुनेछ।
पतञ्जली जग्गा हिनामिना प्रकरणमा अख्तियार दुरूपयोग अनुसन्धान आयोगले अध्यक्ष नेपालसहित ९३ जनाविरुद्ध भ्रष्टाचार मुद्दा दायर गरेको छ। पूर्वप्रधानमन्त्री नेपालसहित ९३ जनाविरुद्ध १८ करोड ५८ लाख ५० हजार विगो माग गरिएको छ। २०६६ माघ १८ मा नेपाल नेतृत्वको मन्त्रिपरिषद्ले पतञ्जलीलाई आयुर्वेदिक विश्वविद्यालयको नाममा सञ्चालन गर्न काभ्रेमा हदबन्दी छुटमा ८ सय १५ रोपनी जग्गा किन्न स्वीकृति दिएको थियो।
अख्तियारले भ्रष्टाचार मुद्दा दायर भएसँगै एकीकृत समाजवादीका सांसद नेपालको पद निलम्बनमा परेको छ।
