असार १० काठमाडौँ । पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले भिजिट भिसा प्रकरणमा संसद अवरोध जारी राखेको राष्ट्रिय स्वतन्त्र पार्टी(रास्वपा) बारे अहिले केही टिप्पणी नगर्ने बताएका छन् ।
मंगलबार संसदीय दलको कार्यालय सिंहदरबारमा पूर्वप्रधानमन्त्री तथा नेकपा एकीकृत समाजवादीका अध्यक्ष माधव नेपालसँग छलफलपछि बाहिरिने क्रममा सञ्चारकमीसँग कुरा गर्दै उनले बिस्तारै रास्वपाले सबै कुरा थाहा पाउने स्पष्ट पारे ।
साथै नेपालसँग गम्भीर कुराकानी केही नभएको उनको भनाइ छ । ‘संसदमा भएको गतिरोध, सरकारले गठन गरेको छानबिन समिति, समाजवादी मोर्चा लगायतका विषयमा सामान्य छलफल भएको हो । गम्भीर विषयमा छलफल भएको होइन’, उनले भने, ‘रास्वपा र रवि लामिछानेलाई अन्याय नहोस् भनेर अन्तिमसम्म प्रयास गरेको छु । अझै गर्दैछु । रास्वपाका साथीहरूले एकदिन सबै कुरा बुझ्नेछन् ।’
भिजिट भिसा प्रकरणमा सरकारले सोमबार पूर्वमुख्य सचिव शंकरदास वैरागीको नेतृत्वमा ७ सदस्यीय समिति गठन गरेको थियो ।
