काठमाडौँ । प्रतिनिधिसभामा देखिएको गतिरोध अन्त्यका लागि भएको नेपाली कांग्रेस र नेकपा (माओवादी केन्द्र) का नेताहरूबिचको छलफल विना निष्कर्ष सकिएको छ ।
नयाँ बानेश्वरस्थित संसद् भवनमा कांग्रेसका उपसभापति पूर्णबहादुर खड्का, नेता ज्ञानेन्द्र कार्की तथा माओवादीका तर्फबाट उपमहासचिवद्वय वर्षमान पुन र शक्तिबहादुर बस्नेत तथा प्रमुख सचेतक हितराज पाण्डे छलफल भएको थियो ।
छलफलमा आफूहरूको अडानमा कुनै सहमति नभएको माओवादी प्रमुख सचेतक पाण्डेले जानकारी दिए ।
काँग्रेस र एमाले गृहमन्त्रीलाई राजीनामा गराउन र छानविन समिति बनाउन तयार नहु्रँदा संसद अवरुद्ध पार्दै आएका बिपक्षीहरुले आज पनि संसद खोल्ने संभावना कम देखिएको छ ।
कांग्रेस नेता कार्कीले सहमति जुटिनसकेको तर बैठक सकारात्मक रहेको बताए ।
संसद्को गतिरोध हटाउने विषयमा शनिबार कांग्रेस सभापति शेरबहादुर देउवा र माओवादी अध्यक्ष पुष्पकमल दाहालबिच छलफल भएको थियो ।
त्यसअघि शुक्रबार माओवादी अध्यक्ष प्रचण्डले कांग्रेसका नेताहरू खड्का, कार्की, कांग्रेसका प्रमुख सचेतक श्यामकुमार घिमिरेसँग गरेको छलफल पनि विना निष्कर्ष सकिएको थियो ।
