जेष्ठ २४, काठमाडौँ । नेपाल व्यायाम मन्दिरका ग्रेस महर्जन प्रथम प्रज्ञा स्मृति पुरुष तथा महिला शारीरिक सुगठन प्रतियोगितामा ओभरअल च्याम्पियन भएका छन् । उनले २ लाख ५० हजार रुपैयाँ पुरस्कार पाए ।
शनिबार नेपाल पुलिस क्लबमा भएको प्रतियोगितामा ग्रेस पुरुष ७५ केजीमाथि समूह विजेता हुँदै अन्तिम भिडन्तमा पुगेका थिए । आफ्नो तौल विजेता भएवापत उनले छुट्टै ५० हजार पाए ।
प्रज्ञा स्मृति प्रतिष्ठानद्वारा आयोजित प्रतियोगिताको पुरुष ६० केजीमा ह्यामर फिटनेसका सुमित गिरी, ६५ केजीमा बी एन्ड एल फिटनेस स्टेसनका किशोर लिम्बू, ७० केजीमा बडी गराजका अभिजित राजवंशी र ७५ केजीमा व्यायाम मन्दिरका सुरेश मुनिकार विजेता भए । पुरुषमा पहिलो हुनेले ५० हजार, दोस्रोले ४० हजार, तेस्रोले ३० हजार, चौथोले २० हजार र पाँचौंले १० हजार पुरस्कार पाए ।
महिला खुलामा डिभाइन जिमकी उर्मिला श्रेष्ठले उपाधि जितिन् । उनले १ लाख नगद पुरस्कार पाइन् ।
विजेतालाई पूर्व प्रधानमन्त्री पुष्पकमल दाहाल, राष्ट्रिय खेलकुद परिषद्का सदस्य–सचिव टंकलाल घिसिङ, आयोजक प्रतिष्ठानकी निर्देशक गंगा दाहाललगायतले पुरस्कृत गरे ।
