काठमाडौँ । नेकपा माओवादी केन्द्र निकट युवा सङ्गठन योङ्ग कम्युनिस्ट लिग (वाईसीएल)को नेतृत्व चयनमा सहमति नजुटेपछि विधान संशोधनको तयारी गरिएको छ । अहिले बिधान संसाेधन गरेर नयाँ नेतृत्व चयन गर्ने तयारी गरिएकाे हाे ।
अध्यक्ष पदमा पुष्प ओली लगभग पक्का भएको तर अन्य पदमा आकाङ्क्षीबिच सहमति नहुँदा विधान संशोधन गरेर समस्याको हला खोजिने एक नेताले जानकारी दिए ।
जेठ २१ गते वाईसीएलको तेस्रो राष्ट्रिय सम्मेलनले ३५ सदस्य पदाधिकारी सहित २५१ सदस्यीय केन्द्रीय समिति रहने पारित गरेको थियो ।
अध्यक्ष पदमा ओलीसहित केहरसिंह कुँवर, कर्म पुलामी, नवराज ऐर, गणेश शाही आकाङ्क्षी थिए । महासचिवमा शाही र ऐरबिच कुरा नमिल्दा विधान संशोधन गरेर भएपनि नेताहरूको व्यवस्थापन गर्ने तयारी भएको ती नेताले भने ।
विधान संशोधन भए ऐर र शाहीमध्ये एकलाई वरिष्ठ उपाध्यक्ष, अर्कोलाई महासचिव बनाउने तयारी छ । ‘अध्यक्ष पदमा पुष्प ओली पक्का जस्तै भएको छ । तर अन्य पदमा कुरा मिलेको छैन । विधान संशोधन गरेर ४१ वा ५१ सदस्य पदाधिकारी बनाउनेबारे छलफल भएको छ । विधान संशोधन भएमा ऐर र शाहीमध्ये एक जना वरिष्ठ उपाध्यक्ष र अर्को महासचिवमा व्यवस्थापन गर्न लागिएको छ । यद्यपि अध्यक्षको दाबेदार कुँवर र पुलामीबिच पनि पदीय व्यवस्थापन मिलेको छैन । त्यही भएर निर्वाचन कार्यतालिका बारम्बार प्रभावित हुँदै आएको छ’, ती नेताले भने ।
जेठ १८ गतेदेखि प्रज्ञा भवन कमलादीमा सुरु भएको सम्मेलन निर्धारित समयमा सम्पन्न नभएपछि शुक्रबारदेखि चावहिलस्थित गोल्डेन दरबार पार्टी प्यालेसमा बन्दसत्र सारिएको छ ।
