नेपाली कांग्रेसका सांसद राजेन्द्र बजगाईंले भ्रष्टाचार आरोप लागेका पार्टीका मन्त्रीहरूलाई तत्काल बर्खास्त गर्न माग गरेका छन्। पार्टी सभापति तथा संसदीय दलका नेता शेरबहादुर देउवालाई पत्र लेख्दै पार्टीको प्रतिष्ठा जोगाउन र संस्थागत शुद्धीकरण गर्न विवादमा मुछिएका तथा भ्रष्टाचार आरोप लागेका मन्त्रीलाई हटाउन माग गरेका हुन्।
‘म आग्रह गर्दछु- पार्टीको प्रतिष्ठा जोगाउन र संस्थागत शुद्धीकरण गर्न, विवादास्पद, भ्रष्टाचारमा मुछिएका, वा कार्यक्षमतामा पूर्ण असफल मन्त्रीहरूलाई तुरुन्त बर्खास्त गरियोस्’ उनले भनेका छन्।
उनले कांग्रेसबाट सरकारमा रहेका गृहमन्त्री रमेश लेखक र पर्यटनमन्त्री बद्री पाण्डेको नाम नै तोकेर कार्यशैलीमाथि प्रश्न उठाएका छन्।
‘गृह मन्त्रीको सचिवालयमा कार्यरत कर्मचारीहरूविरुद्ध अख्तियार दुरुपयोग अनुसन्धान आयोगले छानबिन अघि बढाइसकेको छ। प्रकाशित सार्वजनिक समाचार अनुसार, गृहमन्त्री रमेश लेखक (माननीय रमेश लेखकको भद्रता सम्झदा यो होइन होला भन्ने एउटा मनको छेउमा लागि रहेकै भएतापनि) को सचिवालय नै मानव तस्करी र आप्रवासन दुरुपयोगमा संलग्न देखिएको छ भनिएको छ, तत्काल बर्खास्त गरियोस् , बजगाइले भनेका छन् ।
