काठमाडौं ।
नइ एकेडेमीले निकट भविष्यमा दुई दिने ‘नेपाल भारत विश्वविद्यालय प्राध्यापक सम्मेलन’ गर्ने भएको छ ।
नेपाल भारत विश्वविद्यालय प्राध्यापक सम्मेलनका लागि विद्यावारिधि तहको पठनपाठन हुने दुवै देशका सपूर्ण विश्वविद्यालयबाट कार्यपत्रहरू प्राप्त भैसकेका छन् ।
नइले सम्पूर्ण कार्यपत्र समाविष्ट ‘नेपाली भाषासाहित्यको विकासमा नेपाल तथा भारतका विश्वविद्यालयको भूमिका’नामक ग्रन्थ प्रकाशित गर्ने भएको छ । उक्त ग्रन्थ नौ सय सय पृष्ठ हुने अनुमान गरिएको छ ।
भारतका विभिन्न विश्वविद्यालयबाट नेपाली भाषासाहित्यमा पठनपाठन हुने १३ वटा विश्वविद्यालय केन्द्रित कार्यपत्रहरु प्राप्त भएका हुन् । कलकत्ता विश्वविद्यालय, पटना विश्वविद्यालय, काशी हिन्दू विश्वविद्यालय, उत्तर बङ्ग विश्वविद्यालय, सिक्किम विश्वविद्यालय, कञ्चनजङ्घा विश्वविद्यालय, सम्पूर्णानन्द संस्कृत विश्वविद्यालय, सिद्धार्थ विश्वविद्यालय, गौहाटी विश्वविद्यालय, डिब्रुगड विश्वविद्यालय, पूर्वोत्तर पर्वतीय विश्वविद्यालय, मणिपुर विश्वविद्यालय र असम विश्वविद्यालयहरूमा समेत नेपाली भाषासाहित्यको पठनपाठन हुँदै आएका सूचना सामग्रीको विश्लेषण यी कार्यपत्रहरूमा गरिएको छ ।
यस सम्मेलनमा नेपाल तथा भारतका विभिन्न विश्वविद्यालयबाट नेपाली भाषासाहित्यमा विद्यावारिधि गर्ने ३५० जना प्राज्ञको सहभागिता हुने अनुमान गरिएको छ । साथै विद्यावारिधि शोध गरिरहेका र दर्शनाचार्य पूरा गरेका शोधार्थीलाई समेत यस समारोहमा सहभागी गराउन सकिने छ ।
नेपाल भारत विश्वविद्यालय प्राध्यापक सम्मेलनका लागि त्रिमूर्ति निकेतनका पदाधिकारीहरू प्रा.डा.महादेव अवस्थी संयोजक र प्रा.केशव सुवेदी सल्लाहकार रहनुभएकोछ ।
