सरकारले म्यानमारका भूकम्पपीडितलाई सहायता सामग्री पठाउने भएको छ।
सोमबार राति बालुवाटारमा बसेको मन्त्रिपरिषद् बैठकले सहयोग सामाग्री सहित विमान पठाउने निर्णय गरेको सञ्चार मन्त्री पृथ्वी सुव्वा गुरुङले जानकारी दिए ।
मन्त्री गुरुङले नेपाल सरकारका विभिन्न निकायमा मौज्दात रहेको राहत सामग्री म्यानमार पठाईने जानकारी दिए । हाल मौज्दात रहेको सामग्री पठाउने र त्यसको शोधभर्नाका लागि तत्कालै अर्थ मन्त्रालयले ती निकायहरुलाई रकम निकासा गर्ने निर्णय भएको उनले बताए।
नेपाल वायु सेवा निगमको जहाजमा राहत सामग्री पठाइनेछ। अर्थ मन्त्रालयले जहाजको भाडा भुक्तानी दिनेछ।
यस्तै नेपाली सेनाले आफ्नै जहाजमा मेडिकल उपकरणसहितको टोली पठाउने भएको छ।
म्यानमारमा गत शुक्रबार गएको ७.७ म्याग्निच्युडको भूकम्पमा परी मृत्यु हुनेको संख्या २ हजार नाघेको छ।
म्यानमारको सैन्य सरकारका अनुसार भूकम्पमा परी अहिलेसम्म २ हजार ५६ जनाको मृत्यु भएको हो। यस्तै ३ हजार ९०० भन्दा बढी मानिस घाइते भएका छन् ।
