१७ चैत, काठमाडौं । नेपाल विद्युत प्राधिकरणको कार्यकारी निर्देशकबाट पदमुक्त भएका कुलमान घिसिङले दायर गरेको मुद्दाको पेसी सर्वोच्च अदालतका प्रधानन्यायाधीश प्रकाशमान सिंह राउत र न्यायाधीश शारंगा सुवेदीको इजलासमा परेको छ ।
न्यायाधीश राउत र सुवेदीको इजलासले कुलमानले माग गरेअनुसार अन्तरिम आदेश दिने÷नदिने भन्नेबारे आदेश दिनेछ । यसअघि गत शुक्रबार सर्वोच्चका न्यायाधीश अजिज मुसलमानले अन्तरिम आदेशका लागि दुवै पक्षलाई छलफलमा बोलाउने आदेश दिएका थिए ।
न्यायाधीश मुसलमानको इजलासले कुलमान घिसिङलाई पदमुक्त गर्ने निर्णयसँग सम्बन्धित मुद्दाको मिसिल पनि पेस गर्न आदेश दिएको थियो । यो मुद्दालाई अग्राधिकारमा राखेर सुनुवाई हुन लागेको हो ।
घिसिङलाई उद्योगीहरुलाई पुरानो बक्यौता तिर्न पत्र लेखेकै दिन सरकारले बर्खास्त गरेर हितेन्द्र देव शाक्यलाई नियुक्त गरेको थियो ।
त्यस यता प्रतिपक्षी दलहरुले संसद अवरोध गर्दै आएका छन् भने सडकमा पनि प्रदर्शनहरु भएका छन् ।
