१६ चैत, काठमाडौं । काठमाडौं जिल्ला प्रशासनले काठमाडौंमा जारी गरेको कर्फ्यु हटेको छ । जिल्ला प्रशासन कार्यलयले स्थिति सामान्य रहेको देखेपछि कर्फ्यु हटाएको हो ।
राजावादीहरूको प्रदर्शन उग्र बनेपछि प्रशासनले काठमाडौंको तीनकुनेसहितका क्षेत्र तोकेर शुक्रबार पहिलो पटक राति १० बजेसम्मका लागि कर्फ्यु आदेश गरेको थियो ।
रातिसम्म पनि अवस्था सामान्य नभएपछि शान्तिनगर पुलदेखि मनोहरा खोला पुलसम्मका पाँच स्थान तोकेर जारी भएको कर्फ्यु आदेश आज बिहान ७ बजेसम्मका लागि थपिएको थियो ।
शुक्रबार हिंसात्मक आन्दोलनमा उत्रिएका राजावादीहरूले तिनकुनेमा व्यक्तिको घर जलाउनुका साथै लुटपाट गरेका थिए । त्यसको भिडियो खिच्ने क्रममा पत्रकार सुरेश रजकको जलेर मृत्यु भएको थियो ।
यो आन्दोलनमा दुई जनाको ज्यान गयो भने दर्जनौँ घाईते भएका छन् । त्यस हिंसात्मक घटनापछि प्रहरीले राप्रपा वरिष्ठ उपाध्क्ष रविन्द्र मिश्र, महामन्त्री धवलशमशेर राणा सहित ५१ जनालाई पक्राउ गरीसकेको छ ।
फरार रहेका दुर्गा प्रसाई र लुटपाट र आगजानीमा संलग्नहरुको पहिचान गर्ने र खोजी गरेर पक्राउ गर्ने कार्य प्रहरीले तीव्र पारेको छ ।
