मलेशिया चैत्र १२ । ३६ वर्षपछि फुटबलमा सिंहापुरलाई उसैको घरेलु मैदानमा हराएर उत्साहित भएको नेपाल मलेशिया बिरुद्ध पनि उच्च मनोबलका साथ खेल्ने तयारीमा जुटेको छ ।
नेपालका नवनियुक्त अष्ट्रेलियन प्रशिक्षक म्याट रोषले आज प्रिम्याच कन्फेरेन्समा उच्च प्रदर्शनका साथ तीन अंकको लागि खेल्ने बताए ।
समूह एफमा रहेको नेपाल र मलेसियाबीचको खेल इब्राहिम सुल्तान स्टेडियममा नेपाली समय अनुसार राती ७ः ४५ बजे सुरु हुनेछ ।
प्रशिक्षक रोसले आफूहरू ३ अंककै लागि खेल्ने प्रतिक्रिया दिएका छन् । ‘मलेसिया बलियो टिम हो, ड्र सम्म भएपनि सन्तुष्ट हुन सकिन्छ तर हामी ३ अंककै लागि खेल्नेछौं’ प्रिम्याच कन्फ्रेन्समा बोल्दै उनले भने, ‘हाम्रो योजना भनेको जित्नकै लागि खेल्ने हो, त्यसैअनुसार तयारी भइरहेको छ ।
कप्तान किरण चेम्जोङले अवे मैदान भएपनि राम्रो खेल पस्कने बताएका छन् । ‘हामी नेपालमा पनि धेरै दर्शकहरूको माझमा खेलिसकेका छौं, यहाँ पनि नेपाली समर्थकहरू त हुनुहुन्छ नै’ उनले भने, ‘घरेलु मैदान नभएपनि त्यस्तो फरक पर्दैन, हामी खेल इन्जोए गर्नेछौं यहाँ जुन टिमको दर्शकहरू धेरै भएपनि हामीलाई त्यस्तो फरक पर्दैन। ‘
नेपाल भन्दा तुलनात्मक रुपमा बलियो टोली मलेशिया बिरुद्ध जित निकाल्न सके नेपालले ईतिहास रच्न सफल हुनेछ ।
