प्रधानमन्त्री केपी शर्मा ओलीले सरकारले ल्याएका अध्यादेशहरू सदनबाट स्वीकृत हुने बताएका छन्। उनले आफ्नै पार्टीका नेताहरुसँगको छलफलमा यस्तो बताएका हुन् ।
सरकारले सहकारीसहित ८ वटा अध्यादेश गत माघ १८ गते प्रतिनिधि सभा र राष्ट्रिय सभामा दर्ता गरे पनिसरकारले राष्ट्रिय सभाबाट पारित नहुने त्रासमा पेश गर्न नसकेका बेला प्रधानमन्त्रीको यो दाबी आएको हो ।
सरकारलाई समर्थन गरेको जनता समाजवादी पार्टी नेपाल र सरकारमै सहभागी लोकतान्त्रिक समाजवादी पार्टी नेपालले भूमिसम्बन्धी अध्यादेश स्वीकार गर्न नसक्ने निर्णय गरीसकेका छन् । प्रतिनिधि सभामा कांग्रेस–एमालेको मात्रै पनि बहुमत छ।
राष्ट्रिय सभामा कांग्रेस र एमालेका जम्मा २७ जना सांसद छन् जबकि बहुमतका लागि ३० जना सांसद आवश्यक पर्छ। यसका लागि ३ सांसद भएको जसपा नेपालको साथ अनिवार्य छ।
यस्तो अवस्थामा भूमिसम्बन्धी अध्यादेश के हुन्छ भन्ने प्रश्न उठेको छ।
प्रधानमन्त्री ओलीलाई भेट्न बागमती प्रदेश इन्चार्ज राजन भट्टराई, बागमती अध्यक्ष कैलाश ढुंगेल, पार्वत गुरूङ, देवी ज्ञवालीलगायत नेताहरू बालुवाटार गएका थिए।
