काठमाडौँ, २० माघ : कलाकार, चराविद् तथा साहित्यकार हेम पौड्यालको प्रथम स्मृति दिवसका अवसरमा आज काठमाडौँमा उहाँको कविता सङ्ग्रह लोकार्पणसँगै उहाँले बनाउनुभएका चित्र प्रदर्शनी गरिएको छ ।
नेपाल ललितकला प्रज्ञा–प्रतिष्ठान नक्सालमा प्रतिष्ठान र कपन बानेश्वर राष्ट्रिय साहित्यिक साप्ताहिकको आयोजनामा पौड्यालको सम्झनामा चित्रकला प्रदर्शनी गरिएको हो । कार्यक्रममा प्रतिष्ठानका कुलपति नारदमणि हार्तम्छालीले नेपाली ललितकला क्षेत्रमा चरालाई विषयवस्तु बनाई चित्र कोर्ने सिद्धहस्त कलाकार पौड्याल स्मरणीय व्यक्तित्व रहेको बताउनुभयो । उहाँले पौड्यालका कलामा श्रम, सीप जोडेर प्रकृति र सिर्जनामा शिल्पगत विशेषता रहेको धारणा राख्नुभयो ।
कुलपति हार्तम्छालीले भन्नुभयो, “कलाकार पौड्याल नवपुस्ताको ऊर्जा स्रोत हुनुहुन्छ ।”
नेपाल प्रज्ञा–प्रतिष्ठानका कुलपति भुपाल राईले कलाकार पौड्याल कला सर्जक मात्र नभई प्रकृतिप्रतिको सचेतना भएको भविष्य द्रष्टा पनि भएको बताउनुभयो । कला र साहित्यमा पौड्यालको अतुलनीय योगदान रहेको उहाँको भनाइ थियो । समसामयिक चित्रकला विभाग प्रमुख सञ्जय वान्तावाले कलाकार पौड्यालको परिचय कला, साहित्य र सामाजिक क्षेत्रमा गरी त्रिआयामिक रूपमा रहेको बताउनुभयो ।
पौड्यालकी जीवनसाथी तथा सर्जक गङ्गा कर्माचार्य पौड्यालले पौड्यालको सामाजिक सेवा तथा लगावका बारेमा जानकारी दिनुभयो । कार्यक्रममा अन्तरविद्यालय चित्रकला प्रतियोगितामा प्रथम, द्वितीय र तृतीय हुने क्रमशः करिना बस्नेत, चिराग राई र शीतल महर्जनलाई पुरस्कार प्रदान गरिएको थियो । प्रतियोगितामा २२ कलाकार सहभागी थिए । कविता प्रतियोगीतामा अनाम ‘उपेक्षित’ प्रथम, अनिता ढकाल द्वितीय र सुन्दर ‘शिरीष’ तृतीय हुनुभएको थियो । यसमा २३ कवि सहभागी थिए । पौड्यालले सिर्जना गर्नुभएका चराका चित्रसँगै अन्य २२ कलाकारले बनाएका चित्र यहाँ प्रदर्शनीमा राखिएका छन् ।
