काठमाडौँ, १४ पुस : राष्ट्रिय खेलकुद परिषद् (राखेप) का सदस्य–सचिव टङ्कलाल घिसिङले मिसन–२०२६ को लक्ष्य विशेष प्रशिक्षणमा रहेका खेलाडीबाट पूरा हुने विश्वास व्यक्त गर्नुभएको छ ।
राखेपअन्तर्गत राष्ट्रिय टोली तयारीको व्यवस्थापनमा भएको विशेष प्रशिक्षणअन्तर्गत एन्टी डोपिङ र खेल पोषण कक्षाको समापन कार्यक्रममा सदस्य–सचिव घिसिङले भन्नुभयो, “१९औँ एसियाली खेलकुद सम्पन्न भए लगत्तै हामीले २०औँ एसियाली खेलकुदमा स्वर्णसहित दोहोरो अङ्कमा पदक जित्ने लक्ष्यसहित मिसन–२०२६ अन्तर्गत विशेष तयारी प्रशिक्षण गत आर्थिक वर्षदेखि सुरु गरेका थियौँ । हाम्रो यो तयारी करिब तीन वर्ष चल्छ । यस अवधिको प्रशिक्षणमा सहभागी हुने खेलाडीबाट लक्ष्य हासिल गर्न सकिन्छ भन्ने विश्वास छ ।”
सदस्य–सचिव घिसिङले प्रशिक्षणलाई थप प्रभावकारी बनाउन विदेशी प्रशिक्षक झिकाउने वा खेलाडीलाई विदेशमा पठाउने विषयमा योजनासहित खाका पेस गर्न सम्बन्धित राष्ट्रिय खेल सङ्घलाई निर्देशन दिँदै तालिमले मात्र नपुग्ने भएकाले विश्वका स्तरीय खेलाडी र टोलीसँग प्रतिस्पर्धा गर्नुपर्नेमा जोड दिनुभयो । उहाँले सातदोबाटोमा खेलाडीका लागि फिट्नेस सेन्टर निर्माण कार्य चाँडै सकिने जानकारी गराउँदै स्पोट्र्स साइन्स ल्याबका लागि आवश्यक पर्ने सामग्री खरिदको प्रक्रिया सुरु भइसकेको बताउनुभयो । उहाँले खेलाडीको पुरस्कारको व्ययवस्था कानुनमै उल्लेख भएको हुँदा खेलाडीलाई ढुक्क भएर खेल्न आग्रह गर्नुभयो ।
राष्ट्रिय टिम तयारीका निर्देशक एवं ओलम्पियन दीपक विष्टले सबैको संयुक्त प्रयासबाट मिसन सफल हुने विश्वास व्यक्त गर्दै आफूले ओलम्पिकमा जित्न नसकेको पदक, एसियाली खेलकुदमा जित्न नसकेको स्वर्ण अहिलेका खेलाडीले जितेर इतिहास रचेको खण्डमा आफैले जितेसरह हुने धारणा व्यक्त गर्नुभयो ।
प्रशिक्षकका तर्फबाट भलिबलका मुख्य प्रशिक्षक जगदीशप्रसाद भट्टले प्रशिक्षणका दौरान हुने विभिन्न कक्षाले उर्जा थप्नुका साथै मनोबल पनि बढाएको उल्लेख गर्दै पाएको अवसरलाई भरपुर उपयोग गर्नुपर्ने बताउनुभयो ।
चीनको हाङझाउ एसियाडको करातेमा ऐतिहासिक रजत जितेकी एरिका गुरुङले तयारी राम्रो भइरहेकाले अवश्य सुखद नतिजा प्राप्त हुने विश्वास व्यक्त गर्दै तालिम फाइदाजनक भएको बताउनुभयो । गत मङ्सिर १ गतेदेखि सुरु भएको चालू आर्थिक वर्षको विशेष प्रशिक्षणमा कराते, बक्सिङ, उसु, एथलेटिक्स, जुडो, कुस्ती, पुरुष÷महिला कबड्डी, महिला भलिबल र गल्फका ८५ खेलाडी तथा १९ प्रशिक्षक सहभागी छन् । कार्यक्रममा नेपालले विगतका एसियाडमा हासिल गरेको उपलब्धीको श्रव्यदृष्य प्रदर्शन गरिएको थियो ।
सदस्य–सचिव घिसिङको अवधारणा अनुरुप सन् २०२६ मा जापानमा हुने २०औँ एसियाली खेलकुदमा स्वर्णसहित दोहोरो अङ्कमा पदक जित्ने लक्ष्यसहित गत आर्थिक वर्षदेखि पदकको बढी सम्भावना भएका विभिन्न खेलका खेलाडीलाई समावेश गरी विशेष तयारी प्रशिक्षण सुरु गरिएको थियो । कुनै पनि एसियाली खेलकुद सम्पन्न भए लगत्तै यति लामो समय आगामी संस्करणको तयारी थालिएको पहिलो पटक हो ।
एसियाली खेलकुदको कुनै पनि संस्करणमा नेपालले हालसम्म दोहोरो अङ्कमा पदक जितेको छैन । एसियाली खेलकुदमा नेपाल हालसम्म स्वर्णविहीन छ । सन् १९८६ मा दक्षिण कोरियाको सिओलमा भएको एसियाली खेलकुदमा नेपालले बक्सिङ र तेक्वान्दोमा समान चार चार कास्य पदक प्राप्त गरेको थियो ।
