मङ्सिर २०, काठमाडौँ । काठमाडौँ उपत्यका भित्रका युनेस्को विश्वसम्पदा सूचीमा सूचीकृत अनुपम विश्वव्यापी महत्वका सांस्कृतिक सम्पदाहरुका बिषयमा खोजमूलक रुपमा भीष्म बास्कोटाद्धारा तयार पारिएको नेपालमण्डल (विश्वसम्पदा लोकमाला) नामक पुस्तक यही मङ्सिर २१ गतें शुक्रबार विमोचन हुँदैछ ।
पाटन दरबार सङ्ग्रहालयमा माननीय संस्कृति, पर्यटन तथा नागरिक उड्ययन मन्त्री बद्रीप्रसाद पाण्डेले भोलि साँढे २ बजे उक्त पुस्तक लोकार्पण गर्ने कार्यक्रम रहेको छ । पशुपतिनाथ संरक्षित स्मारक क्षेत्र, बौद्धनाथ संरक्षित स्मारक क्षेत्र, स्वयम्भूनाथ संरक्षित स्मारक क्षेत्र, चाँगुनारायण संरक्षित स्मारक क्षेत्र, पाटन संरक्षित स्मारक क्षेत्र, भक्तपुर संरक्षित स्मारक क्षेत्र तथा हनुमानढोका संरक्षित स्मारक क्षेत्रलगायत काठमाडौं उपत्यका विश्वसम्पदा स्थल भित्रका ऐतिहासिक, धार्मिक, सांस्कृतिक तथा पुरातात्विक महत्वका सांस्कृतिक सम्पदाहरूका बारेमा एकीकृत र लोकलयमा लिखित यो पुस्तक मौलिक र खोजमूलक पुस्तक हो ।
यसले नेपाली इतिहास, संस्कृति र सम्पदाको क्षेत्रमा महत्वपूर्ण योगदान पुर्याउने अपेक्षा गरिएको छ । चार अध्यायमा विभाजित यो पुस्तकमा नेपालका विविध नाम, अर्थ र प्राचीनताको मूलस्रोतसहित विस्तृत व्याख्या गर्नुका साथै प्रत्येक पाठ शीर्षकको अन्तमा विशिष्ट शब्दको अर्थ समेत प्रस्तुत गरिएको छ । साथै नेपाल उपत्यकाभित्र (खोकना, साँखु र कीर्तिपुर) र बाहिर (गोरखा दरबार, नुवाकोट दरबार) का सम्भावित विश्वसम्पदा स्थललाई समेत पुस्तकमा समेटिएको छ । सम्भवत काठमाडौँ उपत्यका भित्रका विश्वसम्पदा सूचीमा सूचीकृत अद्वितीय विश्वव्यापी महत्वका सांस्कृतिक सम्पदाहरुलाई सिङगो एउटै मालाका रूपमा लोकलयमा प्रस्तुत गर्ने पहिलो श्रेय बाँस्कोटालाई नै जान्छ ।
