माल्दिभ्स बिरुद्ध नेपालले घरेलु मैदानमा गोलको बर्षा गरेको छ । रखा पौडल र प्रिति राईको ह्याट्रिकमा नेपालले वुमेन्स साफ च्याम्पियनसीप २०२४ अन्तर्गत सोमबार माल्दिभ्सलाई ११–० ले पराजित गरेको छ । यो जितसँगै नेपाल समूह ‘बी’ को शीर्ष स्थान ओगटेको छ ।
नेपालको दुई खेलबाट चार अंक भएको छ । भुटानको पनि दुई खेलबाट चारै अंक रहेको छ । नेपाल गोल अन्तरको आधारमा समूहको पहिलो रहेको हो । श्रीलंका तीन अंकमा तेस्रोमा छ । माल्दिभ्स भने शून्य अंकमा छ ।
यससँगै प्रतियोगितामा माल्दिभ्सको चुनौती समाप्त भएको छ । अब नेपालले लिग चरणको आफ्नो अन्तिम खेलमा श्रीलंकाको सामना गर्नेछ । भुटान भने माल्दिभ्ससँग भिड्ने छ ।
दशरथ रंगशालामा भएको खेलमा रेखाले पाँच गोल गरिन् । उनले ३२, ४२, ४८, ६३ र ७७ औं मिनेटमा गोल गरिन् । यस्तै, प्रिति राईले भने ६, ६५ र ८७ औं मिनेटमा सम्भव भएको थियो । अन्य तीन गोल भने सविता रानामगर, अनिता केसी र अमिशा कार्कीको नाममा रह्यो ।
सविताले २९, अनिताले ६८ र अमिशाले ८८ औं मिनेटमा गोल गरे । यसै खेलबाट नेपालका लागि सजनी थोकरले डेब्यु गरेकी छिन् ।
