काठमाडौं । नेपालले त्रिकोणात्मक टी-२० सिरिज अन्तर्गत ओमानविरुद्ध ३७ रनको जीत हात पारेको छ ।
ओन्टारियोस्थित किंग सिटी स्टेडियममा भएको खेलमा नेपालले पहिला ब्याटिंग गर्दै पुरा २० ओभरमा १७६ रन जोडेको थियो ।
त्यसपछि १७७ रनको चूनौतीको सामना गरेको ओमनलाई नेपालले १९.१ ओभरमा १३९ रनमा अलआउट गरेपछि ३७ रनको जीत निकाल्न सफल भएको हो ।
नेपालका लागि करण केसीले ३, कुसल भुर्तेल र गुल्सन झाले समान २ तथा सन्दीप लामिछाने, राजन ढकाल र दिपेन्द्र सिंह ऐरीले एक एक विकेट लिएका थिए ।
ब्याटिंग तर्फ गुल्सन झाले नट आउट ४० रन जोडे । उनले १७ बलमा तीन छक्का र तीन चौका प्रहार गरे । ओपनर अनील शाह र आशिफ शेखले समान २७ रन बनाएर राम्रो शुरुवात दिलाएका थिए ।
त्यसै गरी कुसल मल्ल ३० र कुसल भूर्तेल २० रनमा आउट भएका थिए । दिपेन्द्र सिंह ऐरीले अविजीत १८ रन जोडे । कप्तान रोहित पौडेल २ रनमा आउट भएका थिए ।
ओमनका सोर्ईब खानले ४५,रफुल्लाहले ३३ रन बनाएका थिए ।
पहिलो खेलमा क्यानडासँग १४ रनले पराजित नेपाल दोस्रो खेलमा जीत निकाल्न सफल भएको हो ।
यस सिरिजमा नेपालले अर्को खेल मंगलबार नेपाल र क्यानडाबीच, बुधबार नेपाल र ओमानबीच खेल्ने छ ।
