काठमाडौँ, साउन २९ गते । एएफसी च्यालेन्ज लिगको प्लेअफ खेलमा नेपालको लिग च्याम्पियन चर्च ब्वाइज युनाइटेड क्लब भुटानको पारो एफसीसँग पराजित भएको छ ।
दशरथ रङ्गशालामा मङ्गलबार साँझ भएको खेलमा चर्च ब्वाइज पारोसँग २–१ गोलले पराजित भयो । निरन्तर झरीका कारण हिलाम्मे मैदानमा सुरुवाती अग्रता लिएपनि चर्च ब्वाइज स्तब्ध बन्यो ।
पहिलो हाफमा १–१ गोलको बराबरीमा सकिएको खेलमा पारोले दोस्रो हाफमा निर्णायक गोल गरेको थियो । जितसँगै पारो एफसी एएफसी च्यालेन्ज लिगमा छनोट भएको छ । खेलमा सुरुवाती अग्रता चर्च ब्वाइजले लियो ।
३८औँ मिनेटमा लाकेन लिम्बुले गोल गर्दै अग्रता दिलाएका थिए तर, लगत्तै पारोका कर्मा क्षेत्रीमले गोल गर्दै खेललाई बराबरीमा ल्याए ।
त्यसपछि ६७औँ मिनेटमा विलियम ओपोकुले गोल गर्दै पारोलाई जिताउदै समुह चरणमा पुर्याएका छन् ।
सरकार, एन्फा र राष्ट्रिय खेलकुद परिषद्को लापरबाहीले नेपालको एक मात्र अन्तराष्ट्रिय रंगशालाको बिजोग भएको छ । एएफसीले यस अघि पनि अन्तराष्ट्र्रिय प्रतियोगीता गर्न योग्य नभएको भनेपछि नेपालले विश्वकप छनौट अन्य देशमा खेल्नु परेको थियो ।
