प्रमुख प्रतिपक्ष दल नेपाली कांग्रेसले उपप्रधानमन्त्री तथा गृहमन्त्री रवि लामिछानेलाई सहकारी ठगी प्रकरणमा पक्राउ गर्न सरकारसँग माग गरेको छ।
मंगलबारको प्रतिनिधि सभा बैठकमा बोल्दै नेपाली कांग्रेसका सहमहामन्त्री बद्रीप्रसाद पाण्डेले गृहमन्त्रीको जस्तै अभियोगमा वागमती प्रदेश सभा सांसद गीता बस्नेतलाई पक्राउ पुर्जी जारी भएर फरार रहेको भन्दै उस्तै अभियोग लागेका चाँही गृहमन्त्री हुने , यो कहाँको न्याय हो ? उनले प्रश्न गरेका छन् ।
‘एउटै खालको अभियोग भोगिरहेका सदनका माननीय गिता बस्नेतमाथि पक्राउ पुर्जी जारी भएको हामीले सुनेका छौँ। एउटै सदनका दुई जना माननीय सदस्य एउटै अभियोग एक जनालाई पक्राउ पूँर्जी जारी भएर फरारको सूचिमा रहनुपर्ने र अर्को एक जना गृहमन्त्री हुनुपर्ने यो कस्तो बिडम्बना हो, र यो कस्तो न्याय हो ?,’ उनले अघि भने, ‘यस विषयमा हाम्रो दावी यो हो भने गृहमन्त्रीको दाबी छ– म यसमा संलग्न छैन। त्यसो हो भने संसदीय छानविन समिति बनाउ। दाबी अनुसार उहाँ संलग्न भएको होइन भने उहाँले उन्मुक्ति पाउनुहोस, सफाई पाउनुहोस्। दाबी अनुसार उहाँ संलग्न भएको हो भने माननीय गीता बस्नेतलाई जस्तै उहाँलाई पनि पक्राउ पूर्जी जारी होस्। हाम्रो यति मात्रै आग्रह हो।’
उनले गृहमन्त्रीले सदनमा बोल्दा देशको सूचना बेच्नेहरु पनि यही भित्र रहेको भनेपछि त्यो को हो ? तत्काल सार्वजनिक गरेर कार्बाही गर्नु पर्ने नत्र गृहमन्त्रीलाई गलहत्याउन तयार रहेको चेतावनी पनि दिएका छन् ।
