४ चैत, काठमाडौं । गोकर्णेश्वर नगरपालिका ३ स्थित तारेभीर जंगलमा युवतीको हत्या गरेर शव गाडेको घटनामा प्रहरीले अभियुक्तलाई पक्राउ गरी सार्वजनिक गरेको छ ।
स्थानीय १८ वर्षीया सुष्मा लामाको हत्या आरोपमा पक्राउ परेका गोकर्णेश्वर नगरपालिका ३ कै २१ वर्षीय रुपेन्द्र लामालाई उपत्यका अपराध अनुसन्धान कार्यालयले आइतबार सार्वजनिक गरेको हो ।
२४ फागुनको दिउँसो साढे ४ बजेतिर तारेभीरस्थित शिवपुरी राष्ट्रिय निकुञ्जको जंगलमा दुई वटा हात मात्रै देखिएको र अन्य भाग पुरिएको अवस्थामा स्थानीयले देखेर प्रहरीलाई खबर गरेका थिए ।
त्यसदिन प्रहरीले २५ फागुनमा शव उत्खनन गरेको थियो ।
‘शव उत्खनन गर्दा दुई हात बेल्टले बाँधिएको र घाँटीमा टाइले कसिएको अवस्थामा भेटिएको अपराध अनुसन्धान कार्यालयका एसएसपी सोमेन्द्रसिंह राठौरले बताए ।
अनुहार हेरेर मात्र शव चिन्न सकिने अवस्था नभए पनि कपडाको खल्तीमा भेटिएको चाबीबाट उक्त शव सुष्माकै हो भनेर परिवारले शव सनाखत गरेको थियो ।
सुष्मालाई एकै ठाँउका रुपेन्द्रले प्रेमीकाको रुपमा हेरेका थिए । प्रहरीका अनुसार उनीहरु बाख्रा चराउने, घाँस काट्ने जस्ता घरायसी काममा सँगै जाने गर्थे । टेलिफोन र सामाजिक सञ्जालबाट पनि कुराकानी हुने गरेको थियो ।
पछिल्लो आठ महिनायता रुपेन्द्रले सुष्मालाई प्रेमिकाको रुपमा हेर्ने गरेको पाइएको प्रहरी अधिकारीहरु बताउँछन् । तर सुष्माले भने रुपेन्द्रसँग प्रेम सम्बन्ध स्वीकार नगरेपछि उनले हत्या गरेको अनुसन्धानबाट खुलेको छ ।