प्रधानमन्त्री पुष्पकमल दाहाल प्रचण्डले फागुन ३० गते संसदमा विश्वासको मत लिने भएका छन्।
प्रधानमन्त्री प्रचण्डले प्रतिनिधि सभाको बैठकबाट विश्वासको मत लिनका लागि व्यवस्था मिलाउन संघीय संसद् सचिवालयलाई पत्राचार गरिसकेका छन्। उनले पत्रमा संविधानको धारा १०० उपधारा २ अनुसार विश्वासको मत लिने प्रयोजनका लागि व्यवस्था मिलाइदिन संसद सचिवालयसँग आग्रह गरेका छन्।
कांग्रेससँगको गठबन्धन तोडेर प्रचण्डले नयाँ गठबन्धन बनाएपछि पुनः विस्वासको मत लिनु परेको हो । एमाले, माओवादी, रास्वपा, जसपा र एकीकृत समाजवादीको नयाँ गठबन्धन बनेको छ।
कांग्रेस, राप्रपालगायत दल बाहिर परेका छन्। अन्य साना दल हाल सम्म अनिर्णित छन् ।
प्रचण्डले फागुन २१ गते कांग्रेसलाई सरकारबाट हटाएपछि फागुन २२ मा कांग्रेसले समर्थन फिर्ता लिएको थियो।
संविधानमा सरकारलाई समर्थन गरेको दलले समर्थन फिर्ता लिएमा वा सरकारमा सहभागी दल विभाजन भएमा ३० दिनभित्र प्रधानमन्त्रीले विश्वासको मत लिनुपर्ने व्यवस्था छ।
गत वर्षको पुस ११ मा प्रधानमन्त्रीको कार्यभार सम्हालेका प्रचण्डले तेस्रोपटक विश्वासको मत लिन लागेका हुन्। यसअघि गत वर्ष पुस २६ मा पहिलोपटक र चैत ६ मा दोस्रोपटक विश्वासको मत लिएका थिए।
