२० फागुन, काठमाडौं । संक्रमणकालीन न्यायलाई टुंगो लगाउने विषयमा प्रधानमन्त्री पुष्पकमल दाहाल प्रचण्डले सत्ता साझेदार र प्रतिपक्षी प्रमुख दलका शीर्ष नेतासँग अलग अलग छलफल गरेका छन् ।
शुरुमा ओलीसँग छलफल गरेका प्रधानमन्त्रीले त्यसपछि काँग्रेस सभापति शेर बहादुर देउवासँग छलफल गरेका थिए ।
संक्रमणकालीन न्यायसँग सम्बन्धित द्वन्द्व पीडितलाई न्याय तथा परिपुरण गर्ने र पीडकलाई कारबाही गर्ने विषय टुंगो लाग्न बाँकी छ ।
संसदको कानुन न्याय तथा मानवअधिकार समितिमा बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ लाई संशोधन गर्न बनेको (टीआरसी) विधेयकमाथि छलफल हुँदै आएको छ ।
मानव अधिकारको गम्भीर उल्लंघनमा समावेश गरिएको स्वेच्छाचारी रुपमा क्रुरतापूर्वक गरिएको हत्या र दोहोरो भिडन्त बाहेक गरिएको हत्यामध्ये कुनलाई समावेश गर्ने भन्ने विषयमा दलहरुबीच सहमति हुन बाँकी छ ।
प्रधानमन्त्रीसँगको छलफलपछि ओली पनि यो विधेयक टुंगो लगाउन सकारात्मक रहेको र देउवा पनि सकारात्मक रहेको स्रोतले बताएको छ । यो विषय संसदको यही अधिवेशनबाट टुंगो लगाउने योजनामा प्रधानमन्त्री रहेका छन् ।
