नेपालले नामिवियामाथि त्रिकोणात्मक सिरिजमा ३ रनले रोमाञ्चक जीत हात पारेको छ । टियु क्रिकेट मैदानमा भएको खेलमा नामिवियालाई पराजित गरेपछि नेपालको फाईनल खेल्ने संभावना कायम रहेको छ ।
टस हारेर पहिले ब्याटिङको निम्तो पाएको नेपाली टोलीले निर्धारित २० ओभरमा आठ विकेट गुमाएर एक सय ८० रन बनाएको थियो । जवाफी ब्याटिङमा ओर्लिएको नामिबियाले निर्धारित ओभरमा सात विकेट गुमाएर एक सय ७७ रनमात्र बनाउन सक्यो ।
नेपालको जीतमा करण केसी, सोमपाल कामी ,दिपेन्द्र सिंह ऐरी र अविनाश बोहराको बलिङ तर्फ महत्वपूर्ण भूमिका रह्यो । केसी, कामी र ऐरीले दुई दुई विकेट लिँदा बोहराले एक विकेट लिए ।
नेपालका लागि कुशल मल्लले ३७ बल खेल्दै एक चौका र चार छक्काको मद्दतमा ५५ रन बनाए । कुशलले आरिफ शेखसँग पाँचौ विकेटका लागि ८५ रनको साझेदारी गरे । आरिफले आउट हुनुअघि २४ बलमा चार चौकाको सहायताले ३१ रन जोडे ।
त्यस्तै गुलशन झाले १६ बल खेल्दै एक चौका र तीन छक्काको सहायताले २६ रन बनाए भने अनिल शाहले १७ बलमा तीन छक्काको मद्दतमा २३ रन जोडे । दीपेन्द्रसिंह ऐरी आठ बलमा दुई चौका प्रहार गर्दै १६ रनमा आउट भए । कप्तान रोहितकुमार पौडेल नौ बलमा दुई चौका प्रहार गर्दै १० रनमा आउट भए । त्यस्तै सुरुआती ब्याट्सम्यान आसिफ शेख एक रनमा आउट हुँदा करण केसीले सात तथा सोमपाल कामी दुई रनमात्रै बनाए ।
नामिवियाका जेजे स्मीतले ५० रन बनाए भने जनले ३३, जेपी २५ र जेन ग्रिनले अविजीत २३ रन जोडेका थिए ।
यस अघि पहिलो खेलमा नेपाल नामिवियासँगै २० रनले पराजित भएको थियो ।
नेपालले चौथो खेलमा अब नेदरल्याण्डस् बिरुद्ध खेल्नेछ । सो खेल जितेमा नेपाल फाईनल पुग्नेछ ।
