आइसिसी यू–१९ विश्वकप २०२४ को समूहको दोस्रो खेलमा नेपालले पाकिस्तानलाई १९८ रनको लक्ष्य दिएको छ।
दक्षिण अफ्रिकाको इस्ट लन्डनमा टस जितेर पहिले ब्याटिङ गरेको नेपालले अन्तिम बलमा अलआउट हुनुअघि १९७ रन जोड्यो। नेपालका लागि ओपनिङ ब्याटर विपिन रावलले सर्वाधिक ३९ रन बनाए।
लगातार विकेट गुमाएको नेपालको सुरुवात राम्रो हुन सकेन। ओपनिङ ब्याटर अर्जुन कुमाल ४.२ ओभरमा ६ रन बनाएर आउट भए। अर्जुनले न्युजिल्यान्डविरुद्धको अघिल्लो खेलमा ९० रन जोडेका थिए।
अर्जुन आउट भएको दुई ओभरपछि आकास त्रिपाठी ६ रनमै क्याच आउट भए। कप्तान देव खनाल २३ रन जोडेर आउट भएका थिए।
उत्तम मगरले पनि ४ रनभन्दा बढी जोड्न सकेनन्। ओपनिङ ब्याटर विपिन पाँचौं विकेटको रुपमा ३९ रनमा बनाएर आउट भएका थिए।
गुलसन झाले १८ रन मात्र बनाउन सके। यस्तै दिपेश कँडेल १३ रन र दीपक डुम्रे २६ रनमा आउट भए। अन्तिम एक बल बाँकी छदा आउट भएका सुवास भण्डारीले २४ बलमा २० रन जोडे। आकास चन्दले ११ बलमा नटआउट १६ रन जोडे।
बलिङमा पाकिस्तानका अराफत मिनहासले ३ विकेट लिए भने उबेद साह र अहमेद हुसेनले २–२ विकेट लिन सफल भए।
पहिलो खेलमा नेपालले न्युजिल्यान्डसँग हार बेहोरेको थियो। पाकिस्तानले अफ्गानिस्तानलाई हराएको थियो ।
