आईसीसी यू–१९ विश्वकप अन्तर्गत बुधबार नेपालले पाकिस्तानसँग खेल्दैछ । इस्ट लन्डनको बफेलो पार्कमा हुने खेल दिउँसो १ः४५ बजे सुरु हुनेछ। समुह डी को आफ्नो पहिलो खेलमा न्युजिल्यान्डसँग ६४ रनको हार बेहोरेका कारण सुपर सिक्समा पुग्न आज पाकिस्तानलाई हराउनै पर्ने दबाबमा छ । तर बलियो टोली पाकिस्तानलाई हराउन सहज भने छैन ।
पहिलो खेलमा अफगानिस्तानमाथि १ सय ८१ रनको फराकिलो जित निकालेको पाकिस्तान बलियो टोली हो ।
ओपनर अर्जुन कुमाल क्रिजमा टिकेर खेल्न सक्ने क्षमता राख्छन्। उनले न्युजील्याण्ड बिरुद्ध ९० रनको स्कोर खडा गरेका थिए ।
उमेर समूहमा नेपाल र पाकिस्तानबीच अहिलेसम्म ६ खेलमा भेट भएको छ। ती भेटमा नेपालले एक खेलमा मात्र जित निकालेको छ।
नेपालले सन् २००२ मा भएको यू–१९ विश्वकपमा पाकिस्तानलाई ३० रनले हराएको थियो। त्यो नै पाकिस्तानविरुद्धको नेपालको पहिलो जित हो। त्यसयता नेपालले पाकिस्तानलाई हराउन सकेको छैन।
पाकिस्तानविरुद्ध नेपाल ४ खेलमा पराजित हुँदा १ खेल नतिजाविहीन भएको थियो। यू–१९ विश्वकपमा भने नेपाल र पाकिस्तान ३ पटक भिडेका छन्।
सन् २००० मा नेपाल र पाकिस्तान पहिलो पटक आमनेसामने भएका थिए। तर खेल रद्द भएको थियो। सन् २००२ मा भएको दोस्रो भेटमा नेपाल विजय भएको थियो।
विश्वकपमा भने नेपाल र पाकिस्तान सन् २०१६ मा अन्तिम पटक भिडेका थिए। पाचौँ स्थानका लागि भएको खेलमा पाकिस्तानले नेपालमाथि १ सय २२ रनको फराकिलो जित हात पारेको थियो।
यस्तै एसिया कपमा यी दुई टोली तीन पटक नै भेट भएका छन्। एसिया कपमा नेपाल र पाकिस्तान सन् २०१२, २०१३ र २०२३ मा भेट भएका थिए।
यी दुई टोलीबीच अन्तिम पटक सन् २०२३ मा युएईमा भएको एसिया कपको खेल भएको थियो। सो खेलमा नेपाल पाकिस्तानसँग ७ विकेटले पराजित भएको थियो।
