नक्कली भुटानी शरणार्थी प्रकरणः ठूला नेता जेलमै, अन्य केही छुटे

नक्कली भुटानी शरणार्थी प्रकरणः ठूला नेता जेलमै, अन्य केही छुटे

  • शुक्रबार, मंसिर १५, २०८०
  • मिर्मिरे अनलाइन

  • 9.8K
    SHARES

१५ मंसिर, काठमाडौं । नक्कली शरणार्थी प्रकरणमा फैसला गर्दै उच्च अदालत पाटनले उच्च तहका नेता रहेका आरोपितहरुलाई पुर्पक्षका लागि थुनामा नै राख्ने आदेश सुनाएको छ । पूर्वगृहमन्त्री बालकृष्ण खाँणको हकमा दुई न्यायाधीशवीच राय बाझिएको छ ।

उच्च अदालतले नक्कली शरणार्थी प्रकरणमा मुछिएका राजनीतिज्ञ, पदमा बसेकाहरु र प्रत्यक्ष जोडिएकाहरुलाई थुनामा पठाउने जिल्ला अदालतकै आदेश सदर गरेको हो ।

अदालतमा हाजिर भएका २० मध्ये आधाजसो आरोपितलाई भने धरौटीमा छाड्न वा थुनामुक्त गर्न आदेश दिएको छ । नक्कली शरणार्थी प्रकरणमा आरोपित बनाइएका ३० मध्ये १० जना अदालतमा उपस्थित नभई अझै सम्पर्कबाहिर छन् ।

नेपाली नागरिकलाई भुटानी शरणार्थी बनाएर अमेरिका लैजाने नाममा करोडौं ठगी गरेको आरोपमा जिल्ला अदालत, काठमाडौंले १ असारमा पूर्वमन्त्रीसहित १६ जनालाई पुर्पक्षका लागि थुनामा पठाएको थियो ।

त्यही मुद्दामा सुनुवाइ गरेका न्यायाधीशहरु जनक पाण्डे र प्रकाश खरेलको संयुक्त इजलासले नक्कली शरणार्थी प्रकरणमा प्रत्यक्ष रुपमा मुछिएका पूर्वमन्त्री टोपबहादुर रायमाझी, तत्कालीन गृह सचिव टेकनारायण पाण्डे, गृहमन्त्री रामबहादुर थापाका तल्कालीन सल्लाहकार डा. इन्द्रजीत राईलाई थुनामा पठाउन आदेश सदर गरेको छ ।

पीडितहरुसँग रकम उठाउने काममा प्रत्यक्ष संलग्न भई योजनाकारको भूमिकामा रहेका सानु भण्डारी, केशव दुलाल, सन्देश शर्मा, आङटावा शेर्पा, गोविन्द चौधरी, सागर राईलाई थुनामै राख्नुपने रायमा दुवै न्यायाधीश एकमत देखिएका छन् ।

उच्च अदालतले ६ जनालाई धरौटीमा छाड्ने आदेश गरेको छ । शरणार्थी नेता टेकनाथ रिजालसँग १५ लाख रुपैयाँ धरौटी मागेको छ । रिजालले आरोपितहरुबाट रकम लिएको पुष्टि नभएको, ७६ वर्षका जेष्ठ नागरिक देखिएको, उनी शरणार्थी भएर नेपाल बसोबास गरेको अनि अरु देशमा भागेर जाने सम्भावना नभएको इजलासको ठहर छ ।

पूर्वमन्त्री रायमाझीका छोरा सन्दिपसँग पनि उच्च अदालतले ३० लाख रुपैयाँ धरौटी मागेको छ । अर्का आरोपित रामशरण केसीसँग १५ लाख रुपैयाँ धरौटी मागिएको छ।

हज कमिटीका अध्यक्ष शम्सेर मियाँलाई १० लाख रुपैंया धरौटी माग्ने आदेश भएको छ । उनले पाएको सरकारी सुविधाको गाडी ठगीको रकम ओसारपसारमा प्रयोग भएको थियो ।

पूर्वगृहमन्त्री बालकृष्ण खाँडका स्वकीय सचिव नरेन्द्र केसीलाई १० लाख रुपैंया धरौटीमा थुनामुक्त गर्नु भन्ने आदेश भएको छ । पीडितहरुले नरेन्द्र केसीको नाम नपोलेको, बयानमा पनि आरोप स्वीकार नगरेको भन्दै उच्च अदालतले केशव दुलाल र टेकनारायण पाण्डेबीचको म्यासेज आदानप्रदानमा नाम उल्लेख भएका कारण उनलाई थुनामा राख्न नपर्ने ठहर गरेको हो ।

इजलासले हरिभक्त महर्जनसँग १५ लाख मागेको छ । महर्जनले सहकारीका लागि सन्देश शर्मासँग रकम माग गरेको र त्यत्तिका आधारमा उनलाई ठगीमा संलग्न भएको भन्न नमिल्ने भन्दै उच्च अदालतले धरौटीमा छाड्ने आदेश गरेको हो ।

जिल्ला अदालतको आदेशमा १० लाख धरौटी बुझाएर रिहा भएका टंककुमार गुरुङलाई साधारण तारिखमै रिहा गर्न आदेश भएको छ ।आरोपित केशव तुलाधर पनि साधारण तारेखमा छुटेका छन् ।

आशिष बुढाथोकीसँग पीडितहरुको भेटघाट नभएको र उनले कसैसँग रकम मागेको नदेखिएको भन्दै उच्च अदालतले खातामा आएको रकम ट्रान्सफर गरेका कारण थुनामा राख्न नपर्ने भन्दै साधारण तारिखमा रिहा गर्न आदेश दिएको हो ।

लक्ष्मी महर्जन साधारण तारिखमा रिहा भएका छन् । श्रीमान हरिभक्त महर्जनले उनको खाता चलाएको र त्यसक्रममा रकम ट्रान्सफर गरेको भनी बयान दिएका थिए ।

पूर्वगृहमन्त्री खाँणको हकमा दुई न्यायाधीशविच राय बाझिएको छ । एकजना न्यायाधीशले उनलाई थुन्नैपर्नेसम्मको आधार नदेखिएको भनी राय लेखेका थिए भने अर्काले आधार र प्रमाण हेर्दा धरौटीमा छाड्न नहुने राय लेखेका थिए । त्यो विवाद अब तेस्रो न्यायाधीशसमक्ष पेश हुनेछ ।

यसमा तपाइको प्रतिक्रिया
सम्बन्धित समाचार
Like us On Facebook
Follow Us On Twitter
धेरै पढिएको
Mirmire Online ठेगाना:अनामनगर काठमाडौँ
फोन : ०१-५९०१७७५, ९८४१८०८८४९
इमेल : mirmireonline@gmail.com
फेसबुक : facebook.com/onlinemirmire
सूचना तथा प्रशारण बिभाग दर्ता नं.: १७८/०७३-७४
©2016 Mirmire Online. All Right Reserved |  Site By: Sobij
संरक्षक: कल्याण तिम्सिना, प्रबन्ध निर्देशक: सिर्जना तिम्सिना, प्रधान सम्पादक : कृष्ण कुमार श्रेष्ठ, सम्पादक: वाशुदेव तिमिल्सना, प्रवन्धक - श्रीवास दास श्रेष्ठ