एकदिवसीय क्रिकेटमा विराट कोहलीको ५० औं शतक र मोहम्मद सामीको सात विकेटको प्रदर्शनसँगै भारतले न्युजिल्यान्डलाई बुधबार ७० रनले पराजित गर्दै विश्वकप क्रिकेट २०२३ को फाइनलमा प्रवेश गरेको छ ।
जितका लागि ३ सय ९८ रनको लक्ष्य पाएको न्युजिल्यान्डले ४८.५ ओभरमा सबै विकेट गुमाएर ३ सय २७ रन मात्र बनाउन सक्यो ।
भारत सन् २०११ यता पहिलो पटक विश्वकपको फाइनल पुगेको हो । अब उपाधिका भिडन्तमा भारतले दक्षिण अफ्रिका र अस्ट्रेलियाबीच हुने दोस्रो सेमिफाइनल विजेताको सामना गर्नेछ । मोहम्मद सामीले ९.५ ओभरमा ५७ रन खर्चेर सात विकेट लिए ।
न्युजिल्यान्डका लागि ड्यारेल मिचेलले १ सय ३४ रन बनाए । उनले नौ चौका र सात छक्का प्रहार गरे ।
विलियम्सन सामीको बलमा ६९ रन बनाएर आउट भए । विलियसनले मिचेलसँग मिलेर दोस्रो विकेटका लागि १ सय ८१ रनको साझेदारी गरे । यस साझेदारी अगाडि न्युजिल्यान्ड दुई विकेट गुमाएर ३९ रनको स्थितिमा थियो । विलियमसनले आठ चौका र एक छक्का प्रहार गरे । ग्लेन फिलिप्सले ४१ रनको योगदान दिए ।
टस जितेर पहिले ब्याटिङको निर्णय गरेको भारतले चार विकेट गुमाएर ३ सय ९७ रन बनाएको थियो । बिराट कोहलीले १ सय १७ रन बनाए । यस क्रममा उनले वानडे त्रिकेटको आफ्नो ५०औं शतक पूरा गरे ।
उनी वान डे क्रिकेटको इतिहासमा ५० शतक बनाउने पहिलो ब्याटर बने । उनले यसक्रममा सचिन तेन्दुलकरको नाममा रहेको ४९ वान डे शतकको कीर्तिमानलाई उछिने । कोहली पछि श्रेयस अय्यरले ७० बलमा शानदार १ सय ५ रन बनाए । उनले चार चौका र आठ छक्का प्रहार गरे । कप्तान रोहित शर्माले पनि २९ बलमा ४७ रन बनाए ।
रिटायर्ड हर्ट भएर फेरि खेल्न आएका ओपनर शुभमन गिलले ६६ बलमा ८० रन बनाए । न्युजिल्यान्डका बलरमध्ये टिम साउथीले तीन विकेट लिए ।
अघिल्लो विश्वकपको सेमिफाईृनलमा भारत न्युजील्याण्डसँग पराजित भएको थियो । यस पटक समुह चरणमा पनि अपराजित रहेको भारतले उ सँग बदला लिएको छ ।
