कार्तिक १४ काठमाण्डौँ । काठमाण्डौँमा जारी टी–२० विश्वकप छनौट अन्तर्गत आफ्नो दोस्रो खेलमा नेपालले मलेशिया बिरुद्ध ६ विकेटको जीत निकालेको छ । मलेशियाले दिएको १६६ रनको लक्ष्य नेपालले १२ बल बाँकी छँदै पूरा गर्यो ।
मंगलबार नेपालको जितमा निर्णायक बने कुसल मल्ल । उनले बिष्फोटक ब्याटिङ गर्दै ३४ बलमा ६५ रन बनाएपछि नेपालले सहज जीत निकाल्यो । मल्लले ७ छक्का र २ चौका प्रहार गरेका थिए ।
त्यस अघि ओपनर कुसल भूर्तेलले पनि नेपाललाई आक्रामक शुरुवात दिलाएका थिए । भूर्तेलले २५ बलमा ४३ रन जोड्ने क्रममा चार छक्का र चार चौका प्रहार गरेका थिए ।
त्यसै गरी अर्का ओपनर आशिफ शेखले ३२ रन जोडे । उनले २ छक्का र १ चौका प्रहार गरे । कप्तान रोहित पौडेल २ रन बनाएर आउट भए । सन्दीप जोराले अविजीत १८ रन जोडे । विवेक यादव २ रनमा अविजीत रहे । मलेशियाका लागि मोहम्मद अमीरले ३ विकेट लिए भने पवन दिप सिंहले एक विकेट लिए ।
यसअघि टस जितेर पहिले ब्याटिङ गरेको मलेसियाले निर्धारित २० ओभरमा नौ विकेटको क्षतिमा एक सय ६५ रन बनायो । मलेसियाले राम्रो सुरुवात गरे पनि मध्यक्रमका ब्याटर चल्न सकेनन् । उसका लागि ओपनर एवम् विकेटकिपर सैयद अजिजले सर्वाधिक ६८ रन बनाए । उनले ४९ बलमा दुई छक्का र आठ चौका प्रहार गरे । साथै जुवैदी जुल्किल्फले २४, शाविन मेनाइडी र विजय उन्नीले समान १३ /१३ रन बनाए ।
नेपालका लागि अविनाश बोहराले सर्वाधिक ४ विकेट लिए । त्यसै गरी सन्दीप लामिछाने, गुल्सन झा र रोहित पौडेलले पनि एक एक विकेट लिए । दुई मलेशियन ब्याट्सम्यान भने रन आउट भएका थिए ।
यो जितसँगै नेपाल आईसीसी टी–ट्वान्टी विश्वकप क्रिकेटको एसिया छनोटको सेमिफाइनलमा प्रवेश गरेको छ । मलेसियालाई ६ विकेटले हराउँदै नेपाल प्रतियोगिताको अन्तिम ४ मा प्रवेश गरेको हो ।
टी ट्वान्टी विश्वकपमा सहभागी हुन नेपाल अब मात्र एक जित टाढा छ । नेपाल एक खेल अगावै समूह एबाट सेमिफाइनल पुग्यो । नेपालसँगै समूह एबाट कुवेतसमेत अन्तिम ४ मा प्रवेश गर्यो ।
नेपालले पहिलो खेलमा सिंगापुरलाई हराएको थियो ।
नेपालले समूह विजेता बन्न लिग चरणको अन्तिम खेलमा ओमानसँग खेल्नेछ ।
