असोज ५ काठमाडौं । १९औं एसियाड अन्तर्गत महिला फुटबलमा नेपालले आज भियतनामसँग पहिलो खेलमा प्रतिस्पर्धा गर्दैछ ।
चीनको हान्झाउमा शनिवार औपचारिक उद्घाटन हुने १९औं एसियाड अन्तर्गत फुटबल, भलिबल र क्रिकेट खेलहरु यसअघि नै सुरु भइसकेका छन् । त्यसै क्रममा नेपाली राष्ट्रिय महिला फुटवल टोलीले आज प्रतिस्पर्धा गर्न लागेको हो ।
नेपाल भन्दा भियतनाम बलियो टोली हो । उसले हालै सम्पन्न विश्वकप समेत खेलेको थियो भने नेपालले यस अघि भियतनाम बिरुद्ध खेलेको दुबै खेलमा पराजय व्यहोरेको थियो ।
समूह ‘डी’ मा रहेको नेपाल र भियतनामबीचको खेल वेन्जोउ ओलम्पिक स्पोर्ट्स सेन्टर स्टेडियममा नेपाली समय अनुसार पौने १ बजे सुरु हुनेछ । नेपाली महिला फुटबल टोलीले यसै गेममार्फत एसियन गेम्समा डेब्यु गर्दैछ । पहिलो पटक एसियन गेम्स खेल्न लागेको नेपालले समूह चरणमै विश्व विजेता रहिसकेको जापानसहित भियतनाम र बंगलादेशसँग समुह चरणमै खेल्नेछ ।
रेनुका नगरकोटीको कप्तानीमा रहेको नेपाली टोलीको मुख्य प्रशिक्षकमा बालगोपाल महर्जन छन् ।
