पहिलो पटक एशिया कपमा सहभागी भएको नेपालले आज भारत बिरुद्ध प्रतिस्पर्धा गर्दैछ । कुनै पनि फर्मेटमा विश्व क्रिकेटका महारथी भारत बिरुद्ध नेपालले पहिलो पटक आधिकारीक खेल खेल्न लागेको हो । यस अघि पाकिस्तानसँग उसकै घरेलु मैदानमा खेलेको नेपाल २३८ रनले पराजित भएको थियो ।
श्रीलंकाको क्यान्डीस्थित पल्लेकेले स्टेडियममा भारत र नेपालबीच सोमबार समूह चरणको अन्तिम खेलमा भिडन्त हुँदैछ। नेपाली समयअनुसार दिउँसो सवा ३ बजेदेखि हुने उक्त खेलको समय पनि क्रिकेट स्टेडियम क्षेत्र बादलले ढाक्ने देखिएको छ।
मौसमविदहरुले उक्त समयमा पानी पर्ने सम्भावना ८९ प्रतिशत रहेको जनाएका छन्।
यसै स्टेडियममा शनिबार भएको भारत र पाकिस्तानबीचको खेल पनि मध्यराति बर्षाका कारण रद्द भएको थियो।
यदि सोमबार भारत र नेपाल बीच हुने खेल रद्द भएमा भारत सुपर फोरमा जाने छ।
समूह ए को अंकतालिकामा पाकिस्तान ३ अंकसहित अगाडि छ।
भारत दोस्रो नम्बरमा छ। नेपाल अंक बिहिन छ ।
