अष्ट्रेलिया र न्युजिल्याण्डमा जारी महिला विश्वकप फुटबल प्रतियोगितामा कोलम्बियाले बलियो प्रतिद्वन्द्वी जर्मनीविरुद्ध सनसनीपूर्ण जीत निकालेको छ ।
समूह एच अन्तर्गत आइतबार भएको समूह चरणको खेलमा कोलम्बियाले जर्मनीविरुद्ध २–१ गोल अन्तरले पराजित गरी ईतिहाँस रच्यो । कोलम्बियाको यो जितलाई विश्वकपकै एक उत्कृष्ट खेल भनिएको छ।
अस्ट्रेलियाको एल्लियान्ज स्टेडियमा भएको यो खेलमा जर्मनीविरुद्ध जितपछि कोलम्बियाका समर्थक खुसीले झुमेका थिए । कोलम्बियाका लागि खेलको ५२ औँ मिनेटमा १८ वर्षीया लिन्डा क्याइसेडोले गोल गर्दै अग्रता बनाइन्। जर्मनीविरुद्ध अग्रता दिलाएकी यी १८ वर्षीया किशोरीले यस अघि दक्षिण कोरियाविरुद्ध पनि गोल गरेकी थिइन्।
कोलम्बियाले कर्नर पाएपछि क्याइसेटोले जर्मनीका डिफेन्डरहरुलाई चिर्दै अग्रता दिलाउन सफल भएकी हु्न। तर जर्मनीले आफूलाई खेलमा फर्कायो। खेलको ८९ औँ मिनेटमा एलेक्सजेन्ड्रा पोपले पेनाल्टीबाट गोल गरेपछि खेल बराबरीमा आएको थियो।
तर कोलम्वियाले खेलको अतिरिक्त समयको सातौँ मिनेटमा म्यानुएला भानेगासको गोलबाट जर्मनीविरुद्ध सनसनीपूर्ण जित निकाल्न सफल भयो। जर्मनीको रक्षापंक्तीबाट अनमार्क अवस्थामा रहेकी उनले हेडमार्फत गोल गरेर जित दिलाउन सफल भइन्। जर्मनीले सन् १९९५ यताका विश्वकपमा कहिल्यै समूह चरणका खेलमा हार भोगेको थिएन।
यो जितपछि समूह एचमा कोलम्बिया २ खेलबाट २ जितसहित अंक जोडेर पहिलो स्थानमा छ। उता पराजित जर्मनी २ खेलबाट १ मा जित र १ मा हारसहित दोस्रो स्थानमा छ।
