भारतमाथि शानदार जीत निकाल्दै पाकिस्तानले श्रीलंकामा जारी एसीसी इमर्जिङ कप क्रिकेट प्रतियोगिताको उपाधि हात पारेको छ। फाईनलमा सनसनीपूर्ण खेल प्रदर्शन गरेको पाकिस्तानले भारतमाथि १२८ रनको बिशाल अन्तरले पराजित गर्यो । पाकिस्तानले दिएको ३५३ रनको चूनौती पछ्याएको भारत २२४ रनमै अलआउट भएको थियो । यो सँगै समुह चरणमा हारेको बदला समेत पाकिस्तानले लियो ।
पाकिस्तानलाई उपाधि जिताउने क्रममा तैय्यब ताहिरले ७१ बलमा १ सय ८ रनको सानदार पारी खेले। जवाफी ब्याटिङमा उत्रिएको भारतका लागि सर्वाधिक ६१ रन अभिषेक शर्माले बनाए। त्यसैगरी, यश धुलले ३९ रन जोडे। साइ सुदर्शनको नाममा २९ रन रह्यो।
पाकिस्तानलाई जिताउने क्रममा सुफियान मुकिमले ३, मोहम्मद वासिमले २, मेहरन मुम्ताजले २ र अर्साद इकबालले २ विकेट लिए। यसअघि टस हारेर पहिले ब्याटिङमा उत्रिएको पाकिस्तानले उत्कृष्ट ब्याटिङ गर्दै आफ्नो स्कोर ३५२ मा पुर्याएको थियो।
नेपाल भारत र पाकिस्तान आगामी सेप्टेम्बरमा एशिया कपमा पुनः भीड्ने छन् । नेपाल भने दुबै देशसँग समुह चरणमा यो प्रतियोगीतामा पराजित भएको थियो ।
