असार ५ काठमाण्डौँ । विश्वकप छनौट चरण अन्तर्गत आफ्नो दोस्रो खेलमा नेपालले अमेरीका बिरुद्ध ६ विकेटको उत्कृष्ट जित निकालेको छ । जिम्बाबेको हरारेमा भएको खेलमा अमेरीकाले दिएको २०८ रनको मध्यम चूनौती नेपालले ४३ औँ ओभरमा ४ विकेट गुमाएर पुरा गर्यो ।
नेपालको आजको जीतमा बलिङ तर्फ करण केसी र ब्याटिङमा भीम सार्की निर्णायक बने । करणले शुरु देखि नै १९ रन भित्र अमेरीकाको चार विकेट झारेपछि अमेरीकाले उच्च स्कोर खडा गर्न सकेन । त्यसै गरी गुल्सन झाले तीन विकेट लिँदा दिपेन्द्र सिंह ऐरीले २ र ललित राजवंशीले एक विकेट लिएका थिए ।
ब्याटिङ तर्फ नेपाललाई उत्कृष्ट जित दिलाउन भीम सार्कीले महत्वपूर्ण योगदान गरे । उनले अविजीत ७७ रन बनाए । त्यसका लागि ११४ बल खर्चेका उनले ७ चौका र एक छक्का प्रहार गरे ।
त्यसै गरी दिपेन्द्र सिंह ऐरीले अविजीत ३९ रन जोड्ने क्रममा ३२ बलको सामना गर्दै १ छक्का र पाँच चौका प्रहार गरे ।
ओपनर कुसल भूर्तेलले आज ३९ रन बटुले । अर्का ओपनर आशिफ शेखले १२ रन बनाए भने कप्तान रोहित पौडेल १६ र कुसल मल्ल १३ रनमा आउट भएका थिए । अमेरीकाका शायान जाहागिंरले अविजीत सतक पूरा गरेका थिए ।
नेपाल पहिलो खेलमा जिम्बाबेसँग ८ विकेटले पराजित भएको थियो ।
