असार ३ काठमाण्डौँ । आईसीसी विश्वकप छनौटको पहिलो खेलमा नेपालले आयोजक जिम्बाबेलाई २९१ रनको चूनौती दिएको छ । नेपालले पुरै ५० ओभर खेलेर ८ विकेटको क्षतिमा २९० रन जोड्न सफल भयो । टस जितेर जिम्बाबेले नेपाललाई ब्याटिङको निम्तो दिएको थियो ।
नेपालका लागि ओपनर कुसल भूर्तेलले ९९ रनको योगदान दिए । शतक बनाउन एक रन बाँकी रहेका बेला उनी बोल्ड आउट भएका थिए । उनले ९५ बल खेल्दा २ छक्का र १३ चौका प्रहार गरेका थिए ।
त्यसपछि अर्का ओपनर आशिफ शेखले १ सय बलमा ६६ रन जोड्ने क्रममा ७ चौका प्रहार गरे ।
यसै गरी कुसल मल्लले ४१ रन बनाउदा ३ छक्का र दुई चौका हिर्काए भने रोहित पौडेलले ३१ रन बटुले ।
त्यसपछि आएका आरिफ शेखले १० र गुल्सन झाले १३ रन बनाए । दिपेन्द्र सिंह ऐरी ६ र भीम सार्की शुन्य रनमा पेभिलियन फर्किए ।
जिम्बाबेका लागि रिचार्ड एनगाराभाले सर्वाधिक ४ विकेट लिएर नेपालको रनको गति रोकेका थिए ।
अब नेपालले दिएको लक्ष्य बिरुद्ध जिम्बाबेले जवाफी व्याटीङ थाल्नेछ ।
