जेठ ३२ काठमाण्डौँ । नेपाली राष्ट्रिय फुटवल टोलीले आज बलियो प्रतिद्धन्दी फिलिपिन्स बिरुद्ध मैत्रीपूर्ण फुटवल खेल्दैछ । नेपाली समय अनुसार बेलुकी पौने ५ बजे मनिला स्थित रंगशालामा खेल हुनेछ ।
यो खेलमा नेपालका लागि ईटालियन प्रशिक्षक भिन्सेन्जो अलबर्टो एनिसको परीक्षा हुनेछ । उनले बनाउने रणनीतिले नेपालको प्रदर्शनको मापन हुनेछ । यस अघि फिलिपिन्स बिरुद्ध नेपालको प्रदर्शन कमजोर रहने गरेको थियो ।
भारतको बेंग्लोरमा हुने साफ च्याम्पियनसिप २०२३ को ६ दिनअघि नेपालले अन्तर्राष्ट्रिय मैत्रीपूर्ण खेलमा फिलिपिन्सको सामना गर्न लागेको हो । फिलिपिन्ससँग अहिले सम्म भएका पाँच खेलमा नेपालले एकमा बराबरी र चारमा हार व्यहोरेको छ ।
टिम सम्हालेयता एनिसको यो नेपालका लागि तेस्रो खेलमात्र हुनेछ । अहिलेसम्म खेलेका दुई खेल लाओस र भुटानविरुद्ध छन् । त्यो थ्री नेसन्स कपमा हो । यी दुवै खेलमा नेपाल अपराजित छ ।
राष्ट्रिय टोलीले लामो तयारी गर्न नपाएकाले पनि प्रशिक्षक केही दबाबमा हुनेछन् । घरेलु लिगबाट टोली समयमै रिलिज नहुँदा साफका लागि नेपालले बलियो तयारी गर्न सकेको छैन ।
नेपालले यसपल्ट साफ च्याम्पियनसिपमा भारत र पाकिस्तानसँगै कुवेतको सामना गर्दै छ । यो वर्षबाट दक्षिण एशिया बाहेकका दुई वटा देशले पनि साफमा आमन्त्रित रुपमा प्रतिस्पर्धा गर्दैछन् ।
