चैत १७, नुवाकोट । नुवाकोटको दुप्चेश्वर गाउँपालिकामा जिप दुर्घटना भएको छ । दुर्घटनामा परि २ जनाको घटनास्थलमै मृत्यु भएको छ । अन्य ९ जना घाइते भएका छन् ।
दुप्चेश्वर गाउँपालिका ४ वेतिनिस्थित धारापानीमा आज दिउँसो साढे १ बजेतिर ३९८४ नम्बरको टाटा सुमो दुर्घटना भएको प्रहरीले जनाएको छ ।
दुर्घटनामा दुप्चेश्वरकै २५ वर्षीय छिरिङ तामाङ र १६ वर्षीया मनमाया तामाङको मृत्यु भएको जिल्ला प्रहरी कार्यालय नुवाकोटका डीएसपी खगेन्द्रबहादुर खड्काले जानकारी दिए । उनका अनुसार घाइतेहरुलाई उपचारार्थ तादी गाउँपालिकामा रहेको खरानीटार अस्पताल र काठमाडौंका अस्पतालहरुमा पठाइएको छ ।
जिप ओरालो झर्नेक्रममा भीरबाट करिब ४ सय मिटर तल खसेको छ । दुर्घटनाको कारण खुलेको छैन । दुप्चेश्वर गाउँपालिकाका अध्यक्ष शंकरबहादुर थापाको सचिवालयले उद्धार कार्य जारी रहेको र खराब मौसमका कारण हेलिकप्टर अवतरण गर्न समस्या भइरहेको बताएको छ ।