फागुण १८ काठमाण्डौँ । आइसिसी यू१९ क्रिकेट विश्वकप २०२४ मा स्थान बनाउन आज नेपालले निर्णायक खेल घरेलु टोली युएईविरूद्ध खेल्दैछ।
श्रीलंकामा हुने २०२४ को युवा विश्वकपका लागि एसिया छनोट प्रतियोगिताको आफ्नो अन्तिम खेलमा नेपालले युएईको सामना गर्नेछ। आज जित्ने टोलीले विश्वकप खेल्न पाउने छ । खेल पौने ११ बजे शुरु हुनेछ ।
६ टिमबीच प्रतिस्पर्धा भइरहेको प्रतियोगितामा आजै सबै टिमले आफ्नो अन्तिम खेल खेल्नेछन्। यस अघि नेपाल र युएईले आफ्ना सबै खेल जितेका छन् ।
यसअघि नेपाल र युएईले लगातार चार खेलमा जित निकालेर समान ८ ८ अंक जोडेका छन्। रनरेटमा भने नेपालभन्दा घरेलु टिम युएई अघि छ।
नेपालले सन् २०१६ देखि यू -१९ विश्वकपमा स्थान बनाउन सकेको छैन। सन् २०१८, २०२० र २०२२ गरी नेपालले तीन वटा यू-१९ विश्वकप गुमाइसकेको छ।
सन् २००० मा पहिलो पटक यू(१९ विश्वकप खेलेको नेपालले त्यसपछि २००२, २००४, २००६ र २००८ गरी लगातार पाँच विश्वकप खेलेको थियो।
