फागुण १ काठमाण्डौँ । नयाँ बसपार्कका लोत्सेका ठेकेदार सुनिल कुवँर लगायतले मजदुरमाथि आक्रमण गरेको भन्दै आन्दोलित मजदुरले आज प्रहरी विट र भ्यान नै जलाईदिएका छन् ।
आक्रोशित मजलुरले लोत्से भवनमा समेत तोडफोड गरेका छन् । आन्दोलनमा उत्रिएका यातायात मजदुरले भोलिदेखि अनिश्चितकालका लागि काठमाडौं उपत्यकाभित्र सार्वजनिक यातायात बन्दको घोषणा गरेका छन्। व्यवशायीले पनि भोलीदेखि यातायात नचलाउने जनाएका छन् ।
गंगबुस्थित नयाँ बसपार्कको ठेकेदार कम्पनी लोत्से बहुउद्देश्यीय प्रालिका महाप्रबन्धक सुनील कुँवरलगायतले मजदुर र मजदुरसँग सम्बन्धित संगठनका नेता–कार्यकर्तामाथि आक्रमण गरेको विरोधमा यातायात मजदुरले अनिश्चितकालीन यातायात बन्दको घोषणा गरेका हुन्।
उनीहरूले कुँवरसहित लोत्सकै कर्मचारीहरू पंकज मल्ल, हिमाल कुँवरलगायत अपरिचित ३० जनाको समूहले आक्रमण गरेको बताएका छन् ।
नेपाल यातायात स्वतन्त्र मजदुर संगठनका अध्यक्ष भीमज्वाला राई, नेपाल यातायात मजदुर संघका अध्यक्ष धर्मराज भण्डारी र अखिल नेपाल यातायात मजदुर संघका अध्यक्ष दीपक केसीले संयुक्त विज्ञप्ति जारी गर्दै भोलिदेखि सार्वजनिक यातायात नचलाउने घोषणा गरेका हुन्।
विज्ञप्तिमा आफ्ना दशबुँदे माग पूरा नभएसम्म उपत्यकाका सम्पूर्ण सवारीसाधन बन्द हुने उल्लेख छ।
तीनवटै संगठनले यसअघि १७ माघमा भौतिक पूर्वाधार तथा यातायात मन्त्रालयमा दशबुँदे माग बुझाएका थिए । उनीहरूका अनुसार आक्रमणबाट दर्जनौँ मजदुर र संगठनका नेताहरू घाइते भएका छन्।