काठमाडौं, १५ जेठ । पोखराबाट जोमसोमका लागि उडेको तारा एयरको ट्वीन अटर विमान मुस्ताङको थासाङ स्थित मानापाथी हिमालको फेदीमा दुर्घटनाग्रस्त अवस्थामा फेला परेको छ । मानापाथी हिमालको फेदीमा रहेको ल्याङकु खोलाको मुहानमा उक्त विमान खसेको हो ।
स्थानीयले मानापाथी हिमालको फेदीमा आगो बलेको देखिएको र त्यो जहाज भएको सुचना दिएपछि सुरक्षाकर्मी त्यसतर्फ गईरहेका छन् ।
सम्पर्कविहीन भएको तारा एयरको जहाज खोज्न नेपाली सेना सहितको सुरक्षाकर्मीको टोली स्थानीय सबै परिचालित भएका थिए ।
अहिले घटनास्थलमा उद्धारका लागि सेना, प्रहरी सहितको टोली पुग्ने प्रयास गरीरहेको छ ।
तारा एयरको ९ एन एइटी जहाज मुस्ताङको आकाशमा पुगिसकेपछि १० बजेर ७ मिनेटमा अन्तिम पटक जोमसोम विमानस्थलको टावरसँग सम्पर्कमा आएको थियो । जहाजलाई सिनियर क्याप्टेन प्रभाकर घिमिरेले उडाइरहेका थिए । जहाजमा चालकदलका तीन जनासहित २२ जना यात्रु थिए ।