काठमाडौं, ६ जेठ । सौन्दर्य प्रतियोगितामा सहभागी हुँदा किशोरीमाथि आयोजकद्धारा बलात्कृत भएको घटनाको छानबिन गर्न छानविन समिति बनाईएको छ । ८ वर्षअघिको घटना अनुसन्धान गर्न सरकारले छानविन समिति बनाएको हो।
गृहमन्त्री बालकृष्ण खाणको निर्देशनमा प्रहरी प्रधान कार्यालयले पाँच सदस्यीय छानविन समिति बनाएको छ।
प्रहरी वरिष्ठ उपरीक्षक वसन्त कुँवरको नेतृत्वको समितिमा प्रहरी उपरीक्षक कृष्ण कोइराला, प्रहरी नायब उपरीक्षक कोपिला चुडाल, प्रहरी नायव उपरीक्षक हरि बस्नेत र प्रहरी निरीक्षक सपना खड्का रहेका छन्।
समितिले शुक्रबारबाटै काम सुरु गरेको छ। पीडित युवतीको हिंसा सम्बन्धी भिडियोबारे ध्यानाकर्षण जनाउँदै गृहमन्त्री खाणले भिडियोबारे अनुसन्धान गरि आवश्यक कारबाही गर्न प्रहरीलाई निर्देशन दिएका थिए।
सौन्दर्य प्रतियोगितामा सहभागी हुँदा आयोजकबाटै बलात्कारमा परेको भन्दै भिडियो सार्वजनिक गरेपछि पीडित युवतीलाई न्यायको माग गर्दै युवाहरु प्रदर्शनमै उत्रेका छन्। उनीहरुले बलात्कार मुद्दामा एक वर्षे हदम्याद हटाउन माग गरेका छन्। एक वर्ष हदम्याद कानुन संशोधन गर्न सडकदेखि सदनसम्म आवाज उठेको छ।
