काठमाडौँ, २५ वैशाख । अपरिचित व्यक्तिले दिएको प्रसाद तथा सगुन नखान नेपाल प्रहरीले अनुरोध गरेको छ । स्थानीय तह निर्वाचनअन्तर्गत घरदैलोमा गएका उम्मेदवार स्थानीयले दिएको सगुन खाएर विरामी परेपछि नेपाल प्रहरीले सतर्कता अपनाउन अनुरोध गरेको हो ।
स्थानीय तहको निर्वाचनको सन्दर्भमा प्रचारप्रसारमा हिँडेका राजनीतिक दलका नेता, उम्मेदवार तथा कार्यकर्ताहरु अपरिचित व्यक्तिबाट दिएको प्रसाद, सगुन ग्रहण गर्दा बेहोस हुने र चक्कर लागेर लड्ने गरेको पाइएको भन्दै प्रहरीले त्यस्ता व्यक्तिले दिएको प्रसाद नखान अनुरोध गरेको छ ।
प्रहरी प्रवक्ता एसएसपी विष्णुकुमार केसीले आइतबार सूचना जारी गरेर विभिन्न दलका नेता, उम्मेदवार तथा कार्यकर्ताहरु प्रचारप्रसारका क्रममा घरदैलो कार्यक्रम गरिरहेको अवस्थामा अपरिचित व्यक्तिले दिएको प्रसाद वा सगुन सेवन गर्दा कोही बेहोस हुने र कोही चक्कर लागेर लड्नेजस्ता घटनाहरु घटेको पाइएकाले निर्वाचनजस्तो संवेदनशील समयमा यस्ता घटनाबाट सुरक्षित रहन अनुरोध गरेका छन्।
प्रहरीले निर्वाचन जस्तो संवेदनशील समयमा यस प्रकारका घटनाबाट सुरक्षित रहन र त्यस्तो सूचना प्राप्त भएमा प्रहरीमा खबर गर्न अनुरोध गरेको छ । सर्लाहीको हरिवन नगरपालिका–११ का उम्मेदवार शेष इस्तिहारसहित तीनजना घरदैलो गर्ने क्रममा सगुन खाँदा बिरामी परेपछि प्रहरीले सूचना जारी गरेर सतर्क रहन भनेको हो।
