चैत्र ६ काठमाडौं । भारतका लागि नेपाली राजदूतमा अर्थविद् डा. शंकर शर्मा नियुक्त भएका छन् ।
राष्ट्रपति विद्यादेवी भण्डारीले शर्मालाई आइतबार भारतका लागि नेपालको आवासीय राजदूत नियुक्त गरेकी छन् ।
मन्त्रिपरिषद्को सिफारिसमा शर्मालाई राजदूतमा नियुक्त गरिएको राष्ट्रपतिको कार्यालयले जनाएको छ । भारतका लागि नेपाली राजदूतमा प्रस्तावित डा. शर्माको एग्रिमो नयाँ दिल्लीले चैत २ मा पठाएको थियो ।
शेरबहादुर देउवा नेतृत्वको सरकारले गत कात्तिक ११ गते शर्मासहित तीन देशका लागि राजदूत सिफारिस गरेको थियो । अमेरिका र बेलायतबाट एग्रिमो आइसकेर ती दुवै देशमा नेपाली राजदूतहरुले कार्यभार सम्हालिसकेका छन् । अमेरिका र बेलायतका लागि क्रमशः श्रीधर खत्री र ज्ञानचन्द्र आचार्य नियुक्त भइसकेका छन् ।
यता चीनमा भने ६ महिनादेखि राजदुत खाली रहेपनि सरकारले अझै नियुक्त गर्न सकेको छैन ।