एमाले भित्र अध्यक्ष केपी ओलीमाथि अर्को प्रतिघात भएको छ । ओलीले नै मन्त्री बनाएका पूर्व वनमन्त्री प्रेम आले सहित ८ जना सांसदले सुंईको समेत नदिई एकाएक फ्लोर क्रस गरेर देउवाको पक्षमा मतदान गरेका छन् । माधव नेपाल सहित सो समुहका सांसदले घोषित रुपमै मत दिने भनेका थिए ।
तर संसद भवनमा मतदान भईरहँदा ओली समुहमा रहेका ८ जना सांसदले अन्तिम समयमा देउवाको पक्षमा उभिएर ओलीको साथ छाडेका छन् ।
ती सांसदहरुमा पूर्व वनमन्त्री प्रेम आले, कृष्ण कुमार श्रेष्ठ, हिरा केसी, पार्वती विसुंखे, कलिला खातुन, विनादेवी बुढाथोकी, धनबहादुर बुढा र समिमा हुसेन रहेका छन् ।
यी बाहेक माधव नेपाल, रामकुमारी झाँक्री, निरुदेवी जैरु लगायत कुल २२ एमाले सांसदले देउवाको पक्षमा मतदान दिएका छन् ।
एमालेले देउवाको पक्षमा मत दिनेहरु एमाले हुन नसक्ने निर्णय गरेको थियो । ओलीले मन्त्री समेत बनाएका आफ्नै भनेर ठानेकाहरुले नै अन्तिम समयमा घात गरेको ओली समुहका एक नेताले बताए ।
देउवालाई मत दिनमा माधवकुमार नेपाल, विरोध खतिवडा, जीवनराम श्रेष्ठ, कल्याणी खड्का, मेटमणि चौधरी, भवानी खापुङ, मुकुन्द न्यौपाने, पार्वती विशुंखे, हिरा केसी, कृष्णकुमार श्रेष्ठ किसान रहेका छन् ।
त्यस्तै गोपाल बम, प्रेमबहादुर आले, धनबहादुर बुढा, विना बुढाथोकी, सरला यादव, पुष्पाकुमारी कर्ण, लक्ष्मी चौधरी, निरादेवी जैरु, रामकुमारी झाँक्री, कलिला खातुन, सविना हुसेन र कृष्णलाल महर्जनले पनि देउवालाई मत दिएका छन् ।
