हामीले लामो प्रयत्न गर्यौं
आफ्नै बस्तुस्थिती-स्थिरता,
अन्तर्राष्ट्रिय मान्यताहरु अध्ययन गर्यौ
र, एउटा प्रणाली स्थापित भयो।
सबैका लागि,–
सबैलाई अटाउने घर निर्माण गर्यौ
र, आ-आफ्नो कामको जिम्मेवारी बाड्यौं।
हरेक कामहरुको
आफ्नै मान्यता हुन्छ,
आफ्नै नीति
नियम
र, विधि-विधान हुन्छ
त्यसैले कार्य विभाजन
र, अधिकार बाँडफाँड गर्यौ।
हामी सक्षम थियौ
हाम्रो लक्ष्य उज्वल थियो
तर, कहाँ असफल भयौं?
अथवा, कसरी कमजोर भयौं?
कतै अधिकारलाई बढी नै प्रयोग गर्यौ कि!
वा, प्रयोग गर्नै जानेनौ।
आफूले-आफैलाई मूल्यांकन गर्यौ कि।
वा, आवश्यकता नै ठानीनौं!
हामी एकांकी हुँदै गयौ,
अथवा, सामुहिकतालाई छाड्यौं?
अहिले हाम्रा हरेक कुराहरु
प्रत्येक कामहरु,
कठघरामा उभिएका छन
र, हाम्रो कार्यकुशलतामाथी नै प्रश्न उठेको छ
अनि, हामी प्रश्नहरुको
जवाफ खोजीरहेका छौं।
हाम्रा पाइलाहरु बन्दीजस्तै
इजलासमा उभिएका छन,
र, आफ्नो यात्राको कार्यसूची थन्क्याएर
फैसलाको प्रतिक्षामा छौं।
हामीले कस्तो प्रणाली स्थापित गर्यौं?
अथवा, कसरी कामहरु थाल्यौ?
यी प्रश्नहरु अहिले कठघरामा उभिएका छन
र, हामी त्यसको उत्तर खोजीरहेका छौं।
-२६ असार, २०७८
