दाङ, फाल्गुन १४ । किशोर अवस्थाका छात्राहरु मार्फत महिनावारी बारे जानकारी दिन, महिनावारीका बेला अवनाउनु पर्ने सावधानी बारे जानकारी गराउन, प्याड प्रयोगबारे सचेतना फैलाउन र प्याडको ब्यवस्थापनका गर्ने उद्देश्यले सरस्वती माध्यमिक विद्यालय भरतपुर दाङमा किशोरी क्लव गठन गरिएको छ ।
महिनावारीका बेला पनि किशोरीहरु नियमित रुपमा विद्यालयमा आउने बनाउन, महिनाबारीबारे छात्राहरु स्वयंमलाई र उनीहरु मार्फत परिवार र समाजमा समेत जानकारी दिनका लागि क्वलको गठन गरिएको सरस्वती माध्यमिक विद्यालय भरतपुर दाङका प्रधानाध्यापक बसन्ता पौडेलले जानकारी दिनुभयो । कक्षा ६ देखि १० कक्षासम्म पढ्ने छात्राहरुको शुक्रवार सम्पन्न भेलाबाट सरस्वती माध्यमिक विद्यालय रोज बहिना किशोरी क्लव गठन गरिएको हो ।
क्वलमा आवद्ध छात्राहरुले विद्यालयमा अध्ययनरत किशोर अवस्थाका छात्राहरुलाई महिनाबारी र महिनाबारीका बारेमा सचेतना फैलाउने, प्याड प्रयोग गर्ने तरिका, प्याड प्रयोगको महत्व र त्यसको ब्यवस्थापन बारेमा जानकारी गराउने प्रधानाध्यापक पोडेलले बताउनुभयो ।
छात्राहरुलाई महिनाबारीका लागि आवश्यक पर्ने प्याड एक महिनाका लागि एक जना छात्रालाई १६ वटा प्याड विद्यालयले निशुल्क रुपमा उपलब्ध गराइने विद्यालयले जनाएको छ । विद्यालयका छात्रा मार्फत छात्रा स्वयंमलाई मात्र नभइ उनीहरुको परिवार र समाजमा समेत महिनाबारी बारे सचेतना पुग्ने विश्वास विद्यालयको छ ।
महिनाबारीका बेला गरिने लापरवाहीले महिलाहरुमा क्यान्सर लगायतका प्राणघातक रोगको जोखिम हुने भन्दै त्यसका लागि विद्यालयतहबाटै सजकता अपनाउन शुरु गरिएको प्रधानाध्यापक पौडेलले बताउनुभयो । सरकार र रोज फाउन्डेसनका सहयोगमा कार्यक्रम अघी बढाइने विद्यालयले जनाएको छ ।
कक्षा ८ मा अध्ययनरत छात्रा सरिता राना मगरको अध्यक्षतामा कक्षा ६ देखि १० सम्म पढ्ने छात्राहरुलाई सहभागि गराएर १५ सदस्यीय किशोरी क्लव गठन गरिएको छ । शुरुमा उक्त क्वलका पदाधिकारीहरुलाई तालिम दिइने र उनीहरुले विद्यालय र आफ्नो गाउटोलमा सचेतनामूलक कार्यक्रम गर्ने विद्यालयले जनाएको छ ।
